- सुरज प्याकुरेल / प्रधान सम्पादक, अर्थ सरोकार डटकम
आर्थिक अनलाइन समाचार पोर्टलको क्षेत्रमा केहि नयाँ गर्ने सोचका साथ जुलाई १५, २०१६ अर्थात् साउन १, २०७३ देखि हामी नेपाली सञ्चार क्षेत्रमा प्रवेश गरेका थियौं । संख्यात्मक हिसाबले आर्थिक पत्रपत्रिका वा अनलाइनहरु नेपालमा प्रशस्त रहेका बेला हामीलाई चुनौती थिए र छन् पनि । हामी केहि फरक गर्छौं भन्ने अटोठका साथ आएका थियौं । नेपाली अनलाइन क्षेत्रमा हाम्रो प्रवेश हुँदै गर्दा, हामीले भनेका थियौं, ‘हामी डराउने छैनौं कोहिसँगपनि र गर्नेछौं, निर्भिक र भयरहित पत्रकारिता ।’ र २०१६ को अन्त्यसम्म आइपुग्दा हामीले सकेको गर्यौं । हामीले जति गर्यौं त्यसमा हामी सन्तुष्ट पक्कै छैनौं । गर्न धेरै बाँकी छ, र हामी गरिरहेका छौं ।
सकेको गर्यौं, अझै गर्नेछौं ! माया र साथका लागि पाठकलाई धन्यवाद !
अर्थ सरोकार डटकम सुरु गर्दैगर्दा हामीले धेरै ‘स्कुप’ प्रस्तुत गर्यौं । नउठाइएका यथार्थ र नकेलाइएका सत्य खोज्दै गयौं । यसरी अगाडी बढ्दैगर्दा आज जनताको अगाध माया पाएका छौं । पाठकले अर्थ सरोकार डटकमलाई नेपालको नम्बर वान आर्थिक समाचार पोर्टल बन्न साथ दिनुभएको छ । ‘भर्जिन इस्यु’हरु उठाउने मामलामा हामी निकै अगाडी रह्यौं । यसैबीच हामीले उठाएका विषयलाई केहि ब्रोडशिटहरुले पनि राम्रै स्थान दिए । अनलाइनमा ‘फ्रेश भिडियो कन्टेन्ट’ दिने मामलामा पनि हामी एक कदम अगाडी रह्यौं । सेयर बजार सम्बन्धि नेपालमा दैनिक टेलिभिजन कार्यक्रम सुरु गर्यौं, र निरन्तर जनताका पक्षमा बहस गरिरहयौं ।
अहँ… ! हामी डराउँदैनौं :
हामीले लेखेका समाचारलाई आधार बनाएर हामीलाई धम्की दिने, थर्काउने, वा प्रलोभनमा पार्ने थुप्रै प्रयासहरु पनि भए । यतिसम्मकी ठुला नेता र गुण्डाहरुको नाम जोडेर हाम्रा सम्पादक वा सम्बाददाताहरुलाई थर्काउने काम भयो । कुनै एक अनलाइनलाइ प्रयोग गरेर हाम्रा सम्पादकका निजी कुराहरु खोतलेर समाचार लेख्न र त्यसमा राम्रो प्रायोजन गरिदिने भन्दै एक समूह लागिपरेको कुरा पनि थाहा पायौं । तर डराउनुपर्ने केहि थिएन र छैन पनि । हामी कानुनमा विश्वास गर्छौं । देशमा विधिको शासन छ र सत्य बोल्ने मान्छे डराउंदैन भन्ने हामीलाई राम्रोसँग थाहा छ । यसैबीच अर्थ सरोकार डटकमका सम्पादकलाई ‘सम्झाईदिनुपर्यो’ भन्दै केहि माफियाहरुले सम्पादकका नजिकका मानिसहरुलाई समेत फोन गरेर प्रभावमा पार्ने प्रयासपनि गरे । तर हामी यो मामलामा कति ‘खरो’ छौं भन्ने हामीलाई मात्र थाहा छ । सत्य समाचारका लागि लड्नुपरेपनि हामी लड़नेछौ । लडेकै हौँ, र लडीरहनेछौं ।
हाम्रा पनि कमजोरी भए…
‘मेरो गोरुको बार्है टक्का’ भन्ने पक्षमा हामी छैनौं । यो साँढे ५ महिनामा हामी सिक्दैछौँ । केहि कमजोरी पक्कै छन् । नकारात्मक समाचार बढी प्रस्तुत गर्नु हाम्रो वा देशको वाध्यता हो भन्ने कुरालाई कतै न कतै हाम्रो कमजोरीको रुपमा पनि लिईएको छ । हामीले त्योपनि सोचेका र बुझेका छौं । अर्थ सरोकार डटकम अलि बढीनै ‘कडा’ समाचार लेख्छ भन्ने कुरालाई हामीले पनि मनन गरेका छौँ । आउँदा दिनहरुमा सकारात्मक समाचार पनि पस्कने प्रतिबद्धता जनाउँछौं ।
अर्थ सरोकार साउनमा सुरु भयो । तर यहि बीचमा हामीसँग जोडिन आएकी एक कर्मचारीले गलत काम गरेको थाहा भयो । उनी गैरकानुनी कामहरुमा संग्लग्न रहेको थाहा भयो । समाजमा अपाच्य हुने उनले गरेका केहि व्यक्तिगत कुराहरुलाई लिएर हाम्रो अनलाइनमा काम गर्ने कर्मचारी भन्दै हाम्रो अनलाइनको नामपनि ठाउँ ठाउँमा जोडिन थालियो, जुन खास अस्वाभाविक पनि थिएन । हाम्रा पाठकले हामीलाई दिनुभएको विश्वाशमा हामीले सम्झौता गरेनौं । हामीले भाद्र ३१ गते उनलाई बर्खास्त गर्यौं । यस विषयमा उनको परिवार र आफन्तलाई पनि जानकारी दियौं । हाम्रो समुहमा उनी अहिले छैनन् । उनले गरेका गैर-कानुनी काममा सम्बन्धित निकायले खोजेको वा चाहेको खण्डमा अझै पनि हामी सहयोग गर्न तत्पर छौं ।
अंग्रेजी नयाँ बर्षको अवसरमा टोपी दिवस भनेर मनाउने चलन सुरु गरिएको छ । हामीले यसै कुरालाई साथ र समर्थन गर्दै हाम्रा हरेक कार्यक्रममा नेपाली टोपी लगाएर कार्यक्रम प्रस्तुत गर्ने गरेका छौं ।
अन्त्यमा नयाँ बर्ष २०१७ को धेरै धेरै शुभकामना !
