">
- अर्थ सरोकार सम्बाददाता
काठमाडौं – नेपाल पत्रकार महासंघले विधि, विधान र प्रक्रिया विपरित सदस्यता वितरण तत्काल रोक्नेलगायतका चारबुदे माग राखेर केन्द्रीय कार्यालयको मुलढोका आमरण अनसन बसेका दुई पत्रकारसँगको आजको बार्ता असफल भएको छ ।
महासंघका पाँचथर सभापति लवदेब ढुंगाना र इलामका सदस्य प्रेम अधिकारी पाँचदिनदेखि केन्द्रीय कार्यालयमा तालाबन्दी गरी आमरण अनशन बसिरहेका छन् । उनीहरुले उठाएका जायज माग पुरा गर्न महासंघका केन्द्रीय अध्यक्ष डा.महेन्द्र विष्टसहितको टोली अस्विकार गरेपछि बार्ता निस्कर्षमा पुग्न सकेन् ।
विधानविपरित बाहिरबाट ल्याइएका नयाँ सदस्यता र नविकरण कार्य फिर्ता गरी विधान बमोजिम नयाँ सदस्यता, नविकरण र स्थानान्तरणको अन्तिम टुङ्गो लगाएपछि मात्र अधिवेशन ६ महिना अघि तोक्न माग गरेका छन् ।
राजनीतिक भागबन्डाका आधारमा सदस्यता वितरण तत्काल रोक्न माग विधानविपरित र धाँधलीपूर्ण तरिकाले एकलौटी संचालन गरिएका इलाम र ताप्लेजुङका जिल्ला अधिवेशन खारेजी गरी प्रतिनिधिहरुलाई समेत कारबाहीको माग गरिएको छ ।
लामो समयदेखि पत्रकारितामा निस्क्रिय रहेका, राजनीतिक कार्यकर्ता, सरकारी कर्मचारी र अन्य पेशामा संलग्न महासंघका साधारण सदस्यहरुको शुद्धिकरण अभियान तत्काल सुरु गर्न पनि अनसनकारीले माग गरेका छन् ।
आइतबार साँझ अनसनकारीका तर्फबाट पत्रकार सोमनाथ सुसेली, रामप्रसाद दाहाल, तोयानाथ भट्टराई र विप्लब भट्टराईसहितको टोली र महासंघका तर्फबाट अध्यक्ष डा. विष्ट, उपाध्यक्ष अनिता बिन्दु, महासचिब उजिर मगरलगायत बार्तामा थिए ।
तर अनसनकारीले उठाएको सदस्यता शुद्धिकरण, विवादित जिल्लामा पुनःनिर्बाचनलगायतका विषयमा कुरा नमिलेपछि बार्ता निष्कर्षमा नपुगेको बार्ताटोलीका सदस्य सोमनाथ सुसेलीले जानकारी दिए । अब २४ घन्टाभित्र अनसनकारीको माग पुरा नभए कार्यालयकै परिसरमा अन्य पत्रकारहरुको सहभागितामा रिले अनसन सुरु गर्ने उनले चेतावनी दिए ।
महासंघले भने अनसनकारीले उठाएका मागहरुमा सम्बोधन समेत नगरी सामान्य विज्ञप्ती निकालेर अनसन तोडाउने सहमति गर्न खोजेको बुझिएको छ । उसले अप्ठ्यारा र कठिन मागहरु भन्दै तर्किन खोजेको बताइएको छ ।
अनसनकारीको स्वास्थ्य अवस्था विग्रदो
बुधबार विहानदेखि आमरण अनशनमा बसेका पत्रकारद्वयको स्वास्थ्य अवस्था गम्भिर बन्दै गएको छ । उनीहरुमा शारीरिक कमजोरी, टाउको दुख्ने लगायतका समस्या देखिएपछि आज स्लाइन दिइएको छ । बीर अस्पतालका डाक्टरहरुले उनीहरुको स्वास्थ्य जाँच गरिहेका छन् । तर अनशन निरन्तर रहेमा किड्नीमा समस्या आउने तथा बेहोस हुन सक्ने सम्भावना रहेको बताएका छन् ।
यो पनि पढ्नुहोस् :
