काठमाण्डौ – आज फागुन एक,माओवादीले जनयुद्ध सुरुवात गरेको दिन । सोही दिनको अवसरमा माओवादी छाडेर नयाँ शक्तितिर लागेका डा.वावुराम भट्टराईले पहिलोपटक  सार्वजनिक रुपमा क्षमा मागेका छन्  । उनले जनयुद्धका क्रममा  भएका कमीकमजोरी र दुःखकष्टहरुप्रति क्षमायाचना मागेका हुन ।

नेपाली लोकतान्त्रिक आन्दोलनमा जनयुद्धको भूमिका लामो समय स्मरणीय रहने भन्दै हानी नोक्सानीप्रति आफ्नो हिस्साको जिम्मेवारी लिने समेत बताएका  हुन् ।

जनयुद्ध दिवसको अवसरमा सबै नेपालीमा शुभकामना व्यक्त गर्दै सामाजिक सञ्जाल मार्फत जनयुद्धका सहिद, बेपत्ता र घाइतेप्रति सम्मान पनि व्यक्त गरेका छन ।

  

तत्कालीन नेकपा माओवादीले २०५२ साल फागुन १ गते नेपालमा जनयुद्ध सुरु गरेको थियो । दश वर्ष लामो युद्धको २०६३ सालमा शान्ति सम्झौतासहित अन्त्य भएको घोषणा गरिएको थियो । माओवादी आन्दोलनसम्बद्ध विभिन्न पार्टीहरुले जनयुद्धको सुरुवात भएको दिनलाई ’जनयुद्ध दिवस’का रुपमा मनाउँदै आएका छन् ।