काठमाडौं –  बैंक तथा वित्तीय संस्थाका सञ्चालक र प्रमुख कार्यकारी अधिकृतहरुले सम्पति विवरण सार्वजनिक गर्नु पर्ने भएको छ । संसदबाट पारित बैंक तथा वित्तीय संस्था सम्बन्धि ऐन बाफियाले सम्पति विवरण सार्वजनिक गर्न अनिवार्य गरेको हो ।

वाफिया राष्ट्रपतिबाट प्रमाणीकरण हुन मात्र बाँकी छ । बाफियाको दफा १२० मा सञ्चालक, पदाधिकारी र कार्यकारी प्रमुखले सम्पति विवरको सार्वजनिक गर्नु पर्ने व्यवस्था गरेको छ ।

उनीहरुले आफ्नोवाहेक आफ्ना परिवारको नाममा रहेको चल अचल सम्पूर्ण सम्पति तथा दायित्वको विवरणसमेत सार्वजनिक गर्नु पर्ने छ । उनीहरुले आर्थिक बर्ष सकिएको ६० दिनभित्र अर्थात भदौ मसान्तभित्र विवरण सार्वजनिक गर्नु पर्छ ।

सञ्चालक र प्रमुख कार्यकारीले सम्पति विवरण राष्ट्र बैंकमा बुझाउनु पर्छ ।  विवरणमा आयको स्रोतसमेत खुलाउनु पर्छ ।

राष्ट्र बैंकले अहिलेकै कानुनअनुसार कर्मचारीले पनि विवरण वुझाउनु पर्ने निर्देशन दिइसकेको छ। तर राष्ट्र बैकमा वुझाउने विवरण कहाँ राखिन्छ, कुन प्रयोजनमा प्रयोग गरिन्छ, केही पनि उल्लेख छैन ।