काठमाण्डौ – उपप्रधान तथा गृहमन्त्री विमलेन्द्र निधिले सरकारले संविधान संशोधनपछिमात्र स्थानीय तहको निर्वाचन घोषणा गर्ने बताएका छन् । रिपोर्टर्स क्लब नेपाल नवलपरासी शाखाले गरेको कार्यक्रममा बोल्दै निधिले एमालेले खोक्रो राष्ट्रवादको कुरा गरेर देशलाई बन्धक बनाएको आरोप लगाए ।

 प्रमुख प्रतिपक्षी दल एमालेसंग बार्ता छलफल गरी सीमांकन लगायतका सबै समस्या समाधान गरेर सरकार देशलाई निकास दिन लागिपरेको उनको भनाई छ । मन्त्री निधिले एमालेको रबैयाको कारण मधेसी मोर्चा बेखुस भएको बताउँदै मोर्चा र एमालेको संवाद सकारात्मक भएकाले संविधान सशोधनको प्रस्ताव सफल हुनेमा आफु विश्वस्त रहेको बताए । 

उनले स्थानीय तह वा निकायको जुनसुकै चुनाव भए पनि कांग्रेसलाई आपत्ति नभएको जिकिर गरे । मुलुकलाई विखण्डन गर्न खोज्ने जो सुकैलाई संविधानले दिएको परिधिभित्र रहेर कारबाही गरिने निधिको भनाई छ ।