काठमाडौं – चिलिमे हाइड्रोपावर कम्पनीले चालु आर्थिक वर्षको दोस्रो त्रैमासमा ५५ करोड ९२ लाख ३४ हजार रुपैयाँ खुद नाफा कमाएको रिपोर्ट सार्वजनिक गरेको छ । खुद नाफा गत वर्ष यही त्रैमासको भन्दा २४ लाख ८४ हजार रुपैयाँले घटेको हो ।

 गत वर्ष चिलिमेले ५६ करोड १७ लाख १८ हजार रुपैयाँ खुद नाफा कमाएको थियो । दोस्रो त्रैमाससम्म आइपुग्दा चिलिमेले बिजुली बिक्रीबाट ६५ करोड ४२ लाख ४१ हजार आम्दानी गरेको छ । यसैगरी, चिलिमेले यो त्रैमासमा कुल नाफा ६१ करोड ४१ लाख तीन हजार रुपैयाँ पुर्याएको छ ।

यस्तो नाफा गत वर्षभन्दा दुई करोड १४ लाख ४९ हजार रुपैयाँले धेरै हो । चिलिमेको सेयर पुँजी तीन अर्ब ४४ करोड ७९ लाख २४ हजार रुपैयाँ छ । कम्पनीको रिजर्भ कोषमा चार अर्ब ५२ करोड ८३ लाख २६ हजार रुपैयाँ छ । यस हिसाबले सेयर पुँजीभन्दा रिजर्भ कोष दरिलो देखिन्छ ।  कम्पनीको प्रतिसेयर आम्दानी गत वर्ष भन्दा घटेर ३२ रुपैयाँ ४४ पैसामा झरेको छ ।

गत वर्ष चिलिमेको प्रतिसेयर आम्दानी ३५ रुपैयाँ ८४ पैसा  थियो । गत वर्ष २३८ रुपैयाँ ७२ पैसा रहेको प्रतिसेयर नेटवर्थ पनि घटेर यसपाली २३१ रुपैयाँ ३३ पैसामा आइपुगेको छ । चिलिमको सहायक कम्पनीहरू निर्माण सम्पन्न हुने तयारीमा पुगेका छन् । सहायक कम्पनी सञ्चालनमा आउन थालेपछि कम्पनीको वित्तीय अवस्थामा थप सुधार हुँदै जाने अपेक्षा गर्न सकिन्छ ।