नेपाली कांग्रेसका सभापति शेरबहादुर देउवाज्यू, 

७० वर्षभन्दा लामो इतिहास भएको नेपाली कांग्रेस परिवारको सदस्यको हैसियतले मेरो तपाईंलाई अन्तिम जय नेपाल ।।

शेरबहादुर देउवाज्यू, तपाईं सायद डडेल्धुराको असीग्राममा बाल्यावस्थामै हुनुहुन्थ्यो होला । त्यतिबेला मेरो हजुरबुबा देशमा प्रजातन्त्रको निम्ति लडिरहनुभएको थियो । हजुरबुबाको देहावसानपछि मेरो बुबाले पनि कांग्रेसमार्फत देशका लागि कति लड्नु भयो र कति समस्या झेल्नुभयो । यतिसम्म कि आफू यो धर्तीबाट बिदा हुने बेलामा दिनुभएका थुप्रै अर्तीहरुमध्ये कांग्रेस पार्टीलाई कहिल्यै नछोड्नु भन्ने अन्तिम इच्छासमेत थियो । जुन कुरा मैले नजिकबाट भोगेको र नियालेको पनि छु, र त बुबाको पदचिह्नलाई मैले समेत पछ्याइरहेँ र कांग्रेसको इमानदार कार्यकर्ता भएर बसिरहेँ आजका दिनसम्म ।

तर मलाई आज आफू कांग्रेस हो भन्न पनि लाज लागिरहेको अवस्था छ । यसको कारण र कारक भनेको कांग्रेसले नेपाली समाज र राजनीतिका विकृति र विसंगतिलाई हटाउन सकेन नै अझ मुलुकमा अस्थिरता निम्त्याउने भूमिका निर्वाह गरिरहेको छ, नेपालका सुरक्षा संयन्त्रलाई कमजोर पार्ने प्रयास गरिरहेको छ, नेपालको स्वाभिमान खतरामा पार्ने काम भएको छ । र, कांगे्रसको नेतृत्वकर्ता भएका कारण तपाईं पनि यसमा त्यतिकै दोषी हुनुहुन्छ । विश्वेश्वर, गणेशमान र कृष्णप्रसाद भट्टराई जस्ता देशले नै गर्व गर्ने नेता जन्माएको कांग्रेसले आज तपाईंकै अहंकारका कारण लाजले शिर निहुराउनुपर्ने अवस्था आएको छ । जुन सम्पूर्ण कांग्रेसप्रेमीहरुका  लागि ठूलो अभिशापको रुपमा आज प्रमाणित भइरहेको छ ।

अहिले तपाईंकै अहंकारका कारण नेपाल प्रहरीभित्र आईजीपी चयन प्रक्रिया रमिता जस्तो भएको छ । आईजीपी विवाद अहिले सर्वोच्च अदालतमा पुगेको छ । अपराधीलाई कानुनको कठघरामा पु¥याउने प्रहरी स्वयं नै न्याय माग्दै अदालतको ढोका ढक्ढकाउनु परेको अवस्था छ । नेपाल प्रहरीमा विगतदेखि नै राजनीतिकरणले विकृति निम्त्याएको थियो नै । यो पटक कांग्रेसका गृहमन्त्री रहेका विमलेन्द्र निधिले वरीयता र कार्यकुशलताका आधारमा निर्णय गरौँ भन्दा क्षेत्रीयतालाई काखी च्याप्ने तपाईंको निर्णयले गर्दा प्रहरीमा चेन अफ कमाण्ड कायम गर्ने गरिमा जुन नेपाली कांग्रेसले पाउने थियो त्यो पनि गुमेको छ । अझ सुरक्षा निकायमा अनावश्यक हस्तक्षेप र भागबण्डाको राजनीतिले जनतामा कांग्रेसको साख गिरेको छ । 

नेपालको प्रजातन्त्रको जननी मान्ने हाम्रो पार्टीले विधिविधानको पालना गरेर देखाउनुपथ्र्यो, अरुलाई सिकाउनुपथ्र्यो । सभापतिको हैसियतले तपाईंको जिम्मेवारी थियो त्यो । त्यसले जनतामा कांग्रेसको कति इज्जत बढ्थ्यो ? सायद तपाईंले यति सोचिदिएको भए ‘नेपाली कांग्रेसलाई आगामी निर्वाचनमा बहुमत प्राप्त गराइदिन्छु’ भन्ने कसैको आश्वासनमा विश्वास गर्नुपर्दैनथ्यो । जनता आफैले खुशीखुशी नेपाली कांग्रेसलाई बहुमत दिने थिए । 

विगतमा पनि तपाईंकै पालामा आफ्नो स्वार्थका लागि पटकपटक नेपाल प्रहरीमा ३० र ३२ वर्षे सेवा अवधि बनाउने चलखेल भइरहे । यसबाट थुप्रै इमानदार प्रहरीहरुले अन्याय महसुस गर्नु परिरह्यो । नेपाल प्रहरीका होनहार राष्ट्रसेवकहरुका उज्ज्वल भविष्यलाई अन्धकारमा धकेल्ने काम भइरह्यो ।  

देउवाज्यू, तपाईंलाई थाह छ ? नेपाल प्रहरी अहिले अभिभावकविहीन भएको छ । प्रहरी महानिरीक्षक मात्र नभएर प्रहरी संगठनका हरेक विभाग र कार्यालयहरु समेत अहिले कमाण्डरविहीन भएका छन् । अब कति जनाले यो भ्याकुमलाई आफ्नो कुत्सित अभिलासा प्राप्त गर्ने स्वर्ण अवसरको रुपमा लिनेछन् । भ्रष्टाचार मौलाउनेछ । तस्करहरु सलबलाउनेछन् । सेनापतिविनाको सेना अब कुन मोडमा गएर विष्फोट हुन्छ । यो सबै कुराको जिम्मेवारी तपाईंले लिनुपर्नेछ । 

एकपटक पो गलत निर्णय हुन्छ बारम्बार गलत हुन्छ ? कतिसम्म कच्चा खेलाडीको गेम खेल्नुहुन्छ ? अब त जीवनको उत्तरार्धमा पनि आइपुग्नु भइसक्यो । तपाईंको गलत अडानको सजाय किन देशले भोग्ने ? के तपाईं सुदूरपश्चिमको मात्र नेता हो ? समयमै विचार गरिहाल्नुस् तपाईंका घेरामा बस्नेहरुले तपाँईलाई कतै गुमराहमा राखिरहेका त छैनन् ? देशका लागि योग्य र लायक मानिसहरुलाई तपाईंका सहयोगीहरुले तपाईंकहाँ पुग्नै दिएका छन् कि छैनन् ? यो कुराको जानकारी तपाईंले सायद पाउनु भएको छैन । २१औं शताब्दीका जनता तपाईंले सोचे जति कमजोर छैनन् यसलाई पनि कांग्रेसले हेक्का राख्नु पर्छ । 

देउवा ज्यू, नेपाल प्रहरीको इतिहासमा सबैभन्दा दुःखद क्षणको जसरी आरम्भ गर्नु भएको छ यसले तपाईं मात्र हैन तपाईंको पार्टीलाई समेत सिध्याउनेछ । यो कुरा पक्का हो, प्रहरी संगठनलाई यो दुराअवस्थामा ल्याइपु¥याउने मध्येमा भर्खरै सेवा निवृत्त भएका प्रहरी महानिरीक्षक उपेन्द्रकान्त अर्यालको समेत उत्तिकै योगदान छ । हिजोका दिनमा उपेन्द्रकान्त अर्यालले प्रहरी संगठनमा गलत क्रियाकलाप गर्दा पनि चुप लागेर बस्नुभयो । याद गर्नुहोला, इतिहासमा गलत गर्नेलाई कहिल्यै माफी भएको छैन ।

देउवाज्यू, प्रहरी संगठनलाई जसरी विवादमा तान्ने काम गर्नुभयो । जसरी प्रणालीलाई ब्रेक गरेर प्रहरी संगठनको गरिमालाई ध्वस्त गर्ने कार्य गर्नुभयो । नेपाल प्रहरीका अधिकृत मात्र हैनन्, हरेक जवान समेतले तपाईंले गरेका गलत निर्णयको नजिकबाट मूल्यांकन गरिरहेका छन् । 

अन्तमा, तपाईंको दबाबमा प्रचण्ड सरकारले गरेको भनिएका बाध्यकारी निर्णय कानुनसम्मत छ÷छैन भन्ने विषय सर्वोच्च अदालतसम्म पुगेको छ । पक्कै पनि न्यायालयले प्रहरी संगठनमाथि भएको अन्यायलाई न्याय दिएर उल्ट्याउने नै छ । तर, मैले भने तपाईंले बारम्बार गर्ने गरेका हरेक घृणालायक निर्णयबाट आजित भएर नेपाली कांग्रेस पार्टी आजैका मितिबाट सदासदाका लागि छोडेको छु । स्वर्गीय बुबा, सकिन्छ भने मलाई माफ गर्नु तपाईंले दिनुभएका वचनहरुलाई मैले पालना गर्न सकिनँ । सक्नुहुन्छ भने शेरबहादुर देउवा र कांग्रेसीहरुलाई सद्बुद्धि दिनुहोला । जय देश ।।