">
- अर्थ सरोकार संम्वाददाता
काठमाडौं – प्रमुख प्रतिपक्षी दल नेकपा एमालेले वैशाख ३१ गते स्थानीय तहको निर्वाचन गर्ने सरकारको निर्णयको स्वागत गरेको छ । पार्टी केन्द्रीय कार्यालय धुम्बाराहीमा मंगलबार बसेको पार्टी स्थायी समितिको अनौपचारिक बैठकले स्थानीय तहको निर्वाचनको मिति घोषणा गर्ने सरकारको निर्णयको स्वागत गरेको हो ।
बैठकले निर्वाचन सुनिश्चित हुने वातावरण निर्माण गर्न पनि सरकारको गम्भीर ध्यानाकर्षण गराएको छ । निर्वाचनका लागि आवश्यक राजनीतिक तथा कानुनी तयारी सक्न पनि एमालेले सरकारको ध्यानाकर्षण गराएको छ । साथै एमालेले निर्वाचनलाई प्रभावित पार्ने खालका निर्णय नगर्न पनि सरकारको ध्यानाकर्षण गराएको छ ।
निर्वाचन आचारसंहिता प्रतिकूल हुने गरी सरुवा, बढुवा लगायतको काम नगर्न सरकारसँग आग्रह गरिएको एमाले सचिव एवम् प्रचार विभाग प्रमुख योगेश भट्टराईले जानकारी दिए । सरकारले निर्वाचनको मिति घोषणा गरेदेखि नै निर्वाचन आचारसंहिता लागू गर्नुपर्ने निर्वाचन आयोग ऐनमा व्यवस्था छ ।
एमालेले स्थानीय तहको संख्या बढाउन नहुने पार्टीको अडान पनि दोहोर्याएको छ । सोमबार बसेको मन्त्रिपरिषद् बैठकले मधेसमा स्थानीय तहको संख्या बढाउने निर्णय गरेको थियो । स्थानीय तह पुनर्संरचना आयोगको प्रतिवेदन हुबहु कार्यान्वयन गर्नुपर्ने एमालेको माग छ ।
