काठमाडौं – राष्ट्रिय अनुसन्धान विभागमा जागिर लगाईदिन्छु भन्दै प्रलोभनमा पारी ठगी गर्ने एक जनालाई मंगलबार प्रहरीले पक्राउ गरेको छ । प्रहरीले मोरङ बेलबारी घर भई किर्तिपुर बस्दै आएका २७ वर्षीय प्रेम पुरीलाई झापाको काकडभिट्टाबाट ठगीको आरोपमा पक्राउ गरेको हो । 

महानगरीय प्रहरी अपराध महाशाखाको टोलीले पुरीलाई प्रति व्यक्ति दुईदेखि सात लाखसम्म लिई अनुसन्धान विभागमा जागिर लगाईदिन्छु भन्दै ठगी गरेको पत्ता लागेपछि पक्राउ गरेको जनाएको छ । पुराले कन्चनपुर झलारीका दिपेन्द्र कार्कीलगायतका व्यक्तिहरुलाई ठगी गरेको प्रारम्भिक अनुसन्धानमा खुलेको जनाएको छ ।

 पुरीले अरुलाई प्रलोभनमा पारेर जिल्ला विकास समितिको कार्यालय राजविराज, सप्तरीबाट जारी भएको आफ्नो गाविस सचिवको नक्कली स्थायी नियुक्तिको पत्र देखाउँदै ठगी गर्ने गरेको पाइएको महाशाखाले जनाएको छ । उनले पिडितहरुसँग आइएमईबाट पैसा असुल गर्ने गरेको पनि जनाइएको छ ।  उनलाई पक्राउ गरी आवश्यक अनुसन्धान र कारवाहीका लागि महानगरीय प्रहरी परिसर, काठमाडौं पठाइएको पनि महाशाखाले जनाएको छ ।