काठमाडौं – मालपोत कार्यालय भक्तपुरमा कार्यरत तीन कर्मचारी घुस लिँदै गर्दा रंगेहात पक्राउ परेका छन् । अख्तियार दुरुपयोग अनुसन्धान आयोगबाट खटिएको प्रहरीले ६ लाख १४ हजार रुपैयाँ घुससहित उनीहरुलाई बिहीबार पक्राउ गरेको हो । 

पक्राउ पर्नेमा मालपोत कार्यालय भक्तपुरका नायव सुब्बा ऋषिराम बुढाथोकी, लेखनदास विष्णु विश्रुतु र कार्यालय सहयोगी केशव खत्री रहेको प्रहरीले जनाएको छ ।

उनीहरुलाई मालपोत कार्यालय नजिकै रहेको सूवर्ण भोजनालयमा सेवाग्राहीसँग घुस लिँदै गरेको अवस्थामा प्रहरीले पक्राउ गरेको हो । मोहीले भोगचलन गरेको १३ रोपनी गुठीको जग्गा व्यक्तिको नाममा नामसारी गर्ने कामका लागि उनीहरुले घुस लिएको प्रहरीले जनाएको छ । 

प्रहरीका अनुसार बुढाथोकीको साथबाट ४ लाख ४ हजार ५ सय, खत्रीको साथबाट १ लाख २९ हजार ५ सय र निश्रुतुको साथबाट १ लाख रुपैयाँ बरामद भएको छ ।