काठमाडौं  – कञ्चन डेभलपमेन्ट बैंकको ५० प्रतिशत हकप्रद सेयर भर्ने आइतबार अन्तिम दिन हो । बैंकले पुस १८ गतेदेखि हकप्रद सेयर बिक्री खुला गरेको थियो । २ः१ अनुपातमा निष्कासन गरिएको यो हकप्रदमा मंसिर २९ गतेसम्म कायम सेयरधनीले दरखास्त दिन पाउने छन् ।

 बैंकले प्रतिकित्ता एक सय रुपैयाँका दरले नौ लाख ९० हजार कित्ता हकप्रद सेयर बिक्री खुला गरेको हो । हकप्रद सेयरका लागि ग्लोबल आइएमई क्यापिटल लिमिटेड नाचघर काठमाडौं, कञ्चन डेभलप्मेन्ट बैंकको केन्द्रीय र शाखा कार्यालयहरु तथा ग्लोबल आइएमई बैंकको उपत्यका बाहिरका केही शाखा कार्यालयबाट आवेदन दिन सकिनेछ ।

हकप्रदमा बिक्री प्रबन्धकको काम ग्लोबल आइएमई क्यापिटलले गरेको हो । चालु आर्थिक वर्षको दोस्रो त्रैमासमा बैंकको चुक्ता पुँजी २४ करोड ७५ लाख रहेको छ । बैंकले चालु आर्थिक वर्षको दोस्रो त्रैमासमा दुई करोड ९७ लाख ५५ हजार रुपैयाँ खुद नाफा कमाएको छ । कञ्चनको प्रतिसेयर आम्दानी ३० रुपैयाँ ६ पैसा र प्रतिसेयर नेटवर्थ १५७ रुपैयाँ २० पैसा छ ।