">
- अर्थ सरोकार संम्वाददाता
काठमाडौं – लोडसेडिङ हटेपछि नेपाल आयल निगमको थानकोट डिपोमा ठूला बिक्रेता (कन्जुमर) डिजल लिन जान छाडेका छन् । विगतको जाडो याममा डिजल लिन लाइन हुने डिपोमा अहिले दैनिक एक दुर्इवटा मात्रै छन् ।
लोडसेडिङ हटेपछि उपत्यकामा रहेका तारे होटलले डिजलनै लिन छाडेका छन् । डिपो प्रमुख नेत्र काफ्लेका अनुसार उपत्यकाका धेरैजसो पाँच तारे होटलले अहिले डिजल लिन छाडिसकेका छन् ।
अहिले बोइलर चलाउने र सवारी साधनको लागि आवश्यक हुनेगरी महिना दिन भन्दा बढी समयपछि केही होटल आउँछन्, उनले भने, ठूला होटलले डिजल नलगेको धेरै भइसकेको छ ।
उनले अरु ठूला उपभोक्ताले पनि डिजल लैजान कम गरेको बताए।डिपोबाट अहिले नेपालस्थित भारतीय, अमेरिकी,बेलायती लगायतका दूतावासले १५ दिनमा डिजल लैजाने गरेका थिए । गत वर्षको जाडोमा यी दूतावासले हप्ताको एकपल्ट १२ हजार लिटर डिजल लैजान्थे।काफ्लेका अनुसार यी दूतावासमा सवारी साधनका लागि चाहिने मात्रै डिजल गइरहेको छ ।
निर्माणले बढायो डिजलको माग
लोडसेडिङ कम भएपनि डिजलको माग भने घटेको छैन । थानकोट डिपोबाट अहिले दैनिक सात लाखको हाराहारीमा डिजल बिक्री हुन्छ।काफ्लेका अनुसार भूकम्प र नाकाबन्दीपछि विकासका काम अघि बढेकोले डिजलको माग बढेको हो ।
उनले मेलम्ची खानेपानी आयोजना, चक्रपथ निर्माण,माथिल्लो तामाकोशी जलविद्युत आयोजना लगायतका ठूला परियोजना तीब्रगतिमा अघि बढेकोले डिजलको माग बढेको दाबी गरे ।
