- अर्थ सरोकार संम्वाददाता
काठमाडौँ – शेयर बजारमा बिक्रेताले क्रमश: आत्मविश्वास गुमाउन थालेको देखिएको छ । गत साता पाँचै दिन घटेको बजार आज पनि तिब्र गतिमा ओरालो लाग्यो ।
आइतबार ४३ अंकले बजार खस्किँदा कारोबार भने झन्डै ५० करोड रुपैयाँको भएको छ । बजार तिब्र घट्दा समेत कारोवार रकम बढ्नुले बिक्रेताको मनोबल खस्किन थालेको देखिएको हो ।
गत साताका सुरुवाती दिनसम्म घटाएर किन्ने क्रेता आए पनि बिक्रेता तयार भएका थिएनन् । त्यसैले बजार घटे पनि कारोबार रकम न्युन थियो ।
आइतबार होटल बाहेक सबै उचसूचक ओरालो लागेका छन् । नेप्से परिसूचक ४३.७३ (९३.३७ प्रतिशत) अंकले घटेर १२५२.५ अंकमा झरेको छ। सबै भन्दा धेरै बीमा उपसूचक ६.४३ प्रतिशतले खस्कियो। जलविद्युत ४.०६ प्रतिशत र बैंकिङ उपसूचक ३.६५ प्रतिशतले घटेका छन् ।
खुल्ने बित्तिकै तिब्र गतिमा ओरालो लागेको बजार ११:५० बजे पछि केहि सम्मालिएको थियो। तर साढे १२ बजे देखि फेरि ओरालो लाग्ने क्रम सुरु भयो । १३२ कम्पनीको ४९ करोड ४१ लाख रुपैयाँ बराबरको शेयर खरिद बिक्री भएको हो ।
बजार पुरै रातो हुँदा पनि आइतबार पाँच कम्पनीका शेयरधनीले कमाएका छन् । मेरो माइक्रोफाइनान्सका लगानीकर्ताले पाँच प्रतिशत बढि कमाए ।
प्राइम लाइफ इन्स्योरेन्स र प्रभू इन्स्योरेन्सको शेयर मूल्य १० प्रतिशतले घटेको छ । थप १० कम्पनीका लगानीकर्ताले समेत ९ प्रतिशत बढी गुमाएका छन् ।
