काठमाडौं – राष्ट्रिय प्रजातन्त्र पार्टीको अध्यक्ष चयनका लागि सोमबार मतदान भएको छ । सोमबार दिउँसो १ बजेदेखि काठमाडौंको भृकुटीमण्डपमा अध्यक्ष चयनका लागि मतदान सुरु भएको हो । अध्यक्षमा कमल थापा र प्रदीप बिक्रम राणाको उम्मेदवारी परेको छ ।

राप्रपाका प्रमुख नेताहरु थापा, पशुपति शम्शेर जबरा, लोकेन्द्रबहादुर चन्द र डा प्रकाशचन्द्र लोहनीले थापालाई सर्वसम्मत अध्यक्ष बनाउने निर्णय गरेपनि काठमाडौं क्षेत्र नम्बर ७ का राप्रपा अध्यक्ष राणाले उम्मेदवारी दर्ता गराएका हुन् ।

देशभरीबाट महाधिवेशनमा सहभागी हुन आएका ३ हजार ५ सय प्रतिनिधिले अध्यक्ष चयनका लागि मतदान गर्नेछन् । विद्युतीय भोटिङ मेसिन मार्फत मतदान भइरहेको निर्वाचन समितिले जानकारी दिएको छ । एक पटकमा ६० जनाले मतदान गर्न सक्ने गरी व्यवस्था मिलाइएको राप्रपाका नेता मोहन श्रेष्ठले जानकारी दिए । १४ वटा स्थानमा ६० वटा मेसिन राखिएको छ ।

अध्यक्षमा मतदान सकिएपछि मात्र केन्द्रीय सदस्यका लागि मतदान हुने उनले बताए। अध्यक्ष पदको मतदान सोमबार ४ बजेसम्म सक्ने लक्ष्य रहेको निर्वाचन समितिले जनाएको छ । सोमबार नै केन्द्रीय सदस्यका लागि पनि मतदान हुने सम्भावना कम रहेको छ । 

राप्रपाको महाधिवेशनले अध्यक्ष सहित ९८ जना केन्द्रीय समिति निर्वाचित गर्नेछ । जसमा खुला तर्फका केन्द्रीय सदस्य ४० जना, महिला १६ जना चयन हुनेछन् । त्यस्तै मधेसी २, कर्णाली ४, मुस्लिम २, मुस्लिम महिला २, प्रवास २ आदिवासी जानजाति ९, उत्पीडित २ केन्द्रीय सदस्य चयन हुने केन्द्रीय सदस्यका उम्मेदवार किरण गिरीले जानकारी दिए ।

खुला ४० जनाका लागि १ सय ५६ जनाले उम्मेदवारी दिएका छन् । त्यस्तै १६ जना महिलाका लागि ४२ जनाले उम्मेदवारी दिएका छन् ।