काठमाडौं – सरकारले भारतीय सीमा सुरक्षा बल एसएसबीको गोली लागेर मृत्यु भएका कञ्चनपुरका गोविन्द गौतमलाई सहिद घोषणा गरेको छ । घटनाबारे जानकारी दिँदै उपप्रधानमन्त्री तथा गृहमन्त्री विमलेन्द्र निधिले गौतमलाई सहिद घोषणा गर्ने निर्णय सरकारले गरिसकेको जानकारी गराएका हुन् । त्यस्तै गौतमको परिवारलाई १० लाख रुपैयाँ राहत दिने र दाहसंस्कार पनि सम्मानपूर्वक गर्ने गृह मन्त्री निधिले जानकारी गराएका छन् ।

गौतमको सन्ततिको पठन पाठन पनि निशुल्क गर्ने सरकारले व्यवस्था गरेको छ । गृह मन्त्री निधिले नेपालको सीमा अतिक्रमण कुनै पनि हालतमा स्वीकार्य नहुने बताएका छन् । नेपालको सार्वभौमिकता अखण्डता र सीमामाथि कतैबाट अतिक्रमण र आँच हामीलाई स्वीकार्य हुँदैनु उनले भने नेपाली जनता पूर्ण सचेत छन् । दुबै देशको विवादलाई कुटनीतिक तबरमा निदान गर्न सरकार अग्रसर भइसकेको छ ।

गृहमन्त्री निधिका अनुसार भारतले उक्त घटना आकस्मिक रुपमा भएको प्रधानमन्त्री प्रचण्डलाई जानकारी गराएको छ । आज प्रधानमन्त्री पुष्पकमल दाहाल प्रचण्डलाई भारतीय प्रधानमन्त्रीका सुरक्षा सल्लाहकार अजित दोबलले फोन गरेर दुख ब्यक्त गरेका छन् । यो घटना अन्फर्चुनेट भएको हो । यसको छानबिन गर्ने भनेका छन् । गृह मन्त्रीले भने पोस्टमार्टम र फोरेन्सिक रिपोर्ट सेयर गर्न भनेका छन् ।  घटनाका विषयमा आफू र परराष्ट्र मन्त्री डा.प्रकाशशरण महतले भारतीय विदेश मन्त्रीसँग कुरा गरी घटनाको छानबिन गर्न र परिस्थिति सामान्य बनाउन आग्रह गरेको पनि उनले संसदलाई जानकारी गराएका छन् ।