काठमाण्डौ – चितवनको सौराहामा गुण्डागर्दी गरेको आरोपमा चितवन प्रहरीले ना .२ .च ८३०९ नम्बरको गाडी सहित ४ जनालाई पक्राउ गरेको छ । पक्राउ पर्नेहरुमा खैरहनी नगरपालिका १ बस्ने बर्ष ३४ का निकेश भण्डारी, सोही ठाउँ बस्ने अर्का बर्ष ३० का सुमन डल्लाकोटी , खैरहनी ९ बस्ने ३४ बर्षका सिताराम डल्लाकोटी तथा सुरक्षागार्ड भरतपुर ११ बस्ने ३७ बर्षका दशरथ श्रेष्ठ रहेको जिल्ला प्रहरी कार्यालय चितवनका प्रहरी उपरीक्षक दिपक थापाले जानकारी दिएका छन् ।  

उनीहरु माथि मंगलबार राति सौराहाको पहिलो डान्सबाट ‘लायन्स डेन’ मा तोडफोड गरेको आरोपमा पक्राउ गरिएको हो । सोही क्रममा सुरक्षागार्ड (बाउन्सर)लाई समेत झगडामा संलग्न भएपछि उसलाई पनि नियन्त्रणमा लिईएको प्रहरीले जनाएको छ । डान्सबारमा झगडा गरेर भाग्ने क्रममा प्रहरी चौकी बछौंलीका प्रहरी नायव निरिक्षक दुर्गाबहादुर कुँवरको नेतृत्वको टोलीले उनीहरुलाई नियन्त्रणमा लिएको प्रहरी प्रमुख थापाले जानकारी दिए । पक्राउ परेका सबैलाई गुण्डागर्दी ऐन अन्तरगत अनुसन्धान थालिएको चितवन  प्रहरीले जानकारी दिएको छ ।