काठमाण्डौ –  चितवनको सौराहामा बेमौसमका बेला पर्यटन प्रवर्द्धन गर्ने लक्ष्यसहित आयोजना गरिएको चितवन हात्ती महोत्सवमा ११ लाख २८ हजार रुपैयाँ बचत भएको छ । आज आयोजक क्षेत्रीय होटल संघ चितवनले एक कार्यक्रमको आयोजना गरी महोत्सवको आयव्याय सार्वजनिक गर्दै सो जानकारी दिएको हो ।

नेपालकै लागि नौलो प्रस्तुति रहेको चितवन हात्ती महोत्सवको आर्थिक समितिका संयोजक शीरलाल परियारले यसबर्षको हात्ती महोत्सवमा कुल ४७ लाख ४२ हजार रुपैयाँको कारोबार भएको र खर्च कटाएर ११ लाख २५ हजार रुपैयाँ बचत भएको जानकारी दिए। बचत रकम पर्यटन क्षेत्रमै खर्च गरिने जनाइएको छ । 

 क्षेत्रीय होटल संघ चितवनका अध्यक्ष सुमन घिमिरेले यो बर्षको बचत रकमले पर्यटन प्रवर्द्धनसँगै पर्यटन पूर्वाधार निर्माण, उज्यालो सौराहा कार्यक्रम तथा संघकै भौतिक निर्माणमा खर्च गरिने जानकारी दिए । नेपाल आएका पर्यटकको बसाई लम्ब्याउने उद्देश्यले पर्यटक कम हुने मौसम क्रिसमस र अंग्रेजी नयाँ बर्षको सन्दर्भ पारेर हात्ती महोत्सव आयोजना गरिएको कार्यक्रम संयोजक दीपक भट्टराईको भनाई छ ।

यो बर्ष १३औं संस्करणको रुपमा आयोजना गरिएको महोत्सव अन्तरगत सौराहामै पहिलो पटक अन्तराष्ट्रिय हात्तीपोलो प्रतियोगिता समेत आयोजना गरिएको पोलो संयोजक शंकर सैंजुले बताए । महोत्सवमा हात्ती फाष्टवाक प्रतियोगिता, हात्तीपोलो प्रतियोगिता, हात्तीका छावाहरु बीच रोमाञ्चक फुटवल, हात्ती श्रृङ्गार प्रतियोगिता, गाडा टौड, हात्ती पेन्टिङ, हात्तीको वनभोज, साँस्कृतिक कार्यक्रम र डुंगा दौड प्रतियोगिता आयोजना भएको क्षेत्रीय होटल संघका सचिव राममणि खनालले जानकारी दिए । 

महोत्सवले हात्ती र मानवबीचको सम्बन्ध प्रगाढ गराउन सहयोग गर्ने र यसबाट पर्यटन प्रवर्द्धन र संरक्षणमा टेवा पुग्ने आयोजकको विश्वास रहेको महोत्सव संयोजक दीपक भट्टराईले बताए । १२ बर्ष अघि सौराहामा हात्ती दौड प्रतियोगिताको रुपमा आयोजना भएको कार्यक्रम विगत केही बर्षदेखि हात्ती महोत्सवको रुपमा आयोजना हुँदै आएको छ । आगामी महोत्सव जनावरमैत्री बनाउँदै नयाँ कार्यक्रमहरु ल्याउने संघका सदस्य जितु तामाङले जानकारी दिए ।