काठमाण्डौ  – भट्टामा हाल्न सुकाएर तयारी अवस्थामा राखिएको काँचो इँटा वर्षाका कारण गल्दा लाखौं रुपैयाँ क्षति भएको सिरहाका इँटा व्यवसायीहरूले गुनासो गरेका छन् । शुक्रबार साँझदेखि आइतबार बिहानसम्म परेको पानीका कारण जिल्लाका विभिन्न ठाउँमा रहेका पोल्न तयारी अवस्थामा राखिएका करिब दुई करोड ८० लाख वटा काँचो इँटा गलेको व्यवसायीहरूले बताएका छन् ।

नेपाल इँटा भट्टा महासंघका केन्द्रीय सदस्य रहेका गोलबजारस्थित सागर इँटा उद्योगका सञ्चालक विक्रम साहले ५६ वटा भट्टामा पोल्न राखिएका काँचो इँटा गलेको बताए । ‘इँटा तयारीका लागि मजदूरको पारिश्रमिक, माटो, पानी लगायतको मूल्य जोड्दा प्रतिगोटा लागत नै दुई रुपैयाँ पर्न जान्छ’ साहले भने ‘वर्षाका कारण ५ करो८ रुपैयाँ बराबरको क्षति भएको छ ।’  

अहिलेको सिजन इँटा भट्टा व्यवसायीहरूका लागि पिक सिजन हो, गोलबजारस्थित सगुण इँटा उद्योगका सञ्चालक रामसगुन यादवले भने, ‘वर्षात्को पानीले काँचो इँटा गल्दा व्यवसायीहरुले लागत मूल्य त गुमाउनुका साथै त्यसलाई पुनः गलाएर नयाँ बनाउनु पर्दा दोब्बर मर्का पर्ने भएको छ ।’  सिरहाको गोलबजार क्षेत्रमा मात्र पूर्व–पश्चिम सडक दायाँ बायाँ १८ इँटा भट्टा सञ्चालनमा रहेका छन् । जिल्लाका अन्य भागमा ३८ वटा भट्टा रहेको साहले बताए ।