- अर्थ सरोकार सम्बाददाता
पोखरा – पोखरामा नेपाली कांग्रेसका कार्यकर्ताले आफ्नै पार्टीका अर्का एक कार्यकर्ताको हत्या गरेका छन् । लेखनाथ- ५ सिलिङे निवासी नेपाली कांग्रेसका क्रियाशील सदस्य ५७ वर्षिय ईन्द्र बहादुर रानाभाटलाई सोही वडाका तरुण दलका एक युवकले चिरपटले हानेर हत्या गरेका हुन् ।
अर्थ सरोकार डटकमलाई प्राप्त जानकारी अनुसार गत फागुन १४ गते राती सिलिङेमा संचालन भएको शिवरात्री महोत्सवको समापनको साँझ भएको एक विवादमा यस्तो घटना घटेको थियो । ३० बर्षीय आशिष रानाभाटले चिरपटले हानेर घाइते भएका उनको उपचारका क्रममा शुक्रबार निधन भएको हो ।
रानाभाट नेपाली कांग्रेसका सदस्य हुन भने हत्या गर्ने आशिषपनि नेपाली कांग्रेस निकट तरुण दल लेखनाथ ५ का कार्यकर्ता भएको स्थानीयको भनाइ छ। रानाभाटको शवमा नेपाली कांग्रेस नेता तारानाथ रानाभाट र कास्की कांग्रेसका सभापति कृष्ण केसीले पार्टीको झण्डा ओडाई अन्तिम श्रद्धाञ्जली दिएका थिए ।
