२४.८५ अंकको वृद्धिसँगै साताको सुरुवात गरेको सेयर बजारमा साताभर नै वृद्धि कायम रह्यो । हरेक दिन दोहोरो अंकले बढेको सेयर बजार विहीबार भने सामान्य ४.९६ अंकले बढेर बन्द भयो । गत साता १३५७.३४ अंकमा बन्द भएको सेयर बजार यो साता १४८६.०४ अंकमा पुगेको छ । जसअनुसार, यो साता सेयर बजार १२८.७ अंकले बढेको छ । गत साता सेयर बजार ९.८१ अंकले मात्रै बढेको थियो ।
कारोबारका हिसाबले पनि यो साता सेयर बजार सकारात्मक देखियो । बजारमा देखिएको निरन्तर वृद्धिले लगानीकर्तालाई उत्साहित बनायो । साताको पहिलो दिन ६८ करोडको मात्रै सेयर कारोबार भएको थियो । तर, आइतबार परिसूचक दोहोरो अंकले बढेको प्रभाव सोमबार कारोबार रकममा देखियो । लामो समयपछि सोमबार एक अर्बभन्दा बढीको कारोबार भयो । आइतबारको तुलनामा सोमबार बढी अंकले परिसूचक बढेपछि त्यसको प्रभाव मंगलबारको कारोबारमा देखियो । यद्यपि, मंगलबारदेखि परिसूचकको वृद्धिदरमा कमी आएसँगै बुधबार र विहीबार कारोबार रकम घट्यो । मंगलबार एक अर्ब ४२ करोड, बुधबार एक अर्ब ३६ करोड र विहीबार ९५ करोडको कारोबार भयो । समग्रमा साताभर, पाँच अर्ब ६९ करोड ५४ लाख ४० हजार एक सय ४८ रुपैयाँको कारोबार भएको छ । गत साता एक अर्ब ७९ करोड ३४ लाख ७२ हजार आठ सय २५ रुपैयाँको कारोबार भएको थियो ।
कारोबार रकमको आधारमा यो साता नेशनल लाइफ इन्स्योरेन्स कम्पनी अग्रस्थानमा रह्यो, जसको ३२ करोड ५५ लाख ६० हजार रुपैयाँ बराबरको सेयर कारोबार भएको छ । एनसीसी बैंककोे २५ करोड २७ लाख हजार रुपैयाँ, नेपाल बंगलादेश बैंकको २२ करोड ४ लाख ५० हजार रुपैयाँ, प्रभु बैंकको २१ करोड ८६ लाख ३० रुपैयाँ र सानिमा बैंकको २१ करोड ३३ लाख ४० हजार रुपैयाँ बराबरको सेयर कारोबार भएको छ । यो साता प्रायः लघुवित्त र बीमा कम्पनीका सेयरधनीले धेरै कमाएका छन् ।
