कार्यक्रममा विभिन्न बैंक, नेपाल राष्ट्र बैंक, लगायतका स्टलहरु छन् । आज करिव ११ बजे उद्घाटन भएको यो एक्स्पो भोलि र पर्सी भने विहान १० बजेदेखि साँझ ५ बजेसम्म  आयोजना हुनेछ । कार्यक्रममा ५ लाख हाराहारी अवलोकनकर्ताले भाग लिने कार्यक्रमका संयोजक माधव निर्दोषले बताएका छन् । 

सहभागी संख्या अत्यन्तै न्यून !

एक्स्पोमा सहभागी संख्याभने निकै न्यून देखिएको छ । एक्स्पोमा सहभागी भएका बैंकका कर्मचारी र केहि आमन्त्रित अतिथिबाहेक कार्यक्रममा अरुको खासै सहभागीता देखिएन । कार्यक्रमको उद्घाटन शत्रमा अर्थ सरोकार डटकमका प्रतिनिधि पुग्दा कार्यक्रममा स्टल राखेका कर्मचारी, आमन्त्रित सीइओहरु र केहि मिडियाकर्मी बाहेक कार्यक्रममा कोहिपनि सहभागी भएका छैनन् । 

एक्स्पो सुरु भएको समयदेखि यो समाचार तयार गर्दा अर्थात ३ बजेसम्म  आमन्त्रित अतिथि, सहभागी बैंकका कर्मचारी र पत्रकारबाहेक एक्स्पो हेर्न आउनेहरुको संख्या ५०० पनि पुगेको छैन । आजकै स्थिति हेर्ने हो भनेपनि कार्यक्रममा बाहिरबाट आउने ‘एक्चुअल भिजिटर’ १००० जनापनि नपुग्ने भएको छ । 

कार्यक्रममा न्यून उपस्थिति भएपछी आयोजक र सहभागी बैंकका कर्मचारीपनि निराश भएका छन् । सुरुमा अतिथिहरुले कार्यक्रम अवालोकन गर्दा केहि रौनक देखिएपनि आफ्नो बैंकका ‘प्रोडक्ट’हरुबारे बुझाउन बसेकाहरु काम नपाएर मोबाइलमा फेसबुक चलाएर बसेका छन् । ५ लाख अवलोकनकर्ता आउने दावी गर्ने आयोजक संस्थाका संयोजक माधव निर्दोषसँग हामीले, ‘यहि तालले त ५०० पनि भिजिटर नआउने भए नि ?’ भनी सोध्दा उनले, ‘भर्खर त कार्यक्रम सुरु भयो’ भनी टार्दै हामीसँग बोल्न चाहेनन् । उनीसंग हामीले कुराकानी गर्दा झन्डै २ बजेको थियो ।

आयोजकको लापरवाही !

आयोजकको पारा देख्दा एक्स्पोमा बैंकहरुको स्टल राखेर पैसा कमाउने उदेश्यमात्र देखिएको छ । कुनै स्टलमा पंखा जोडिएको छ भने कुनैमा छैन । यसकारण केहि बैंकका स्टलहरुमा गर्मीका कारण बस्न सक्ने स्थिति नभएको गुनासो सम्बन्धित बैंकका कर्मचारीहरुले राखेका छन् । कार्यक्रम सम्बन्धि प्रचारप्रसारपनि पुगेको छैन । सधैंजसो विभिन्न कार्यक्रम भइरहने भृकुटीमण्डपमा के कार्यक्रम भइरहेको छ भन्ने समेत नबुझ्ने गरी गेट राखिएको छ । कतिपय बैंकका सीइओहरुलाई काय्रक्रमबारे औपचारिक निम्तोनै नदिएको पाइएको छ ।

कार्यक्रममा उपस्थित केहि बैंकका सीइओहरुलाई ठुलो प्राथमिकता दिइएको छ भने, केहि बैंकका सीइओ तथा प्रतिनिधिहरुलाई ‘मान्छे नगन्ने’ प्रवृति देखाइएको छ । एनसीसी बैंकका मार्केटिङ अफिसरलाइ आशन ग्रहण गर्न भनिएको उक्त कार्यक्रममा केहि बैंकका सीइओलाई वास्तै गरिएन । रिवन काट्ने बेलामा निकै नमज्जाको दृश्य देखिएको छ । रिवन आयोजकले बांध्नै बिर्सिएपछी अनिल शाहले हातमानै राखेर गभर्नरले रिवन काटेका थिए ।