काठमाडौँ – श्री एयरलाइन्सले करोडौं डलर अपचलन गरेको खुल्न आएको छ । नागरिक उड्ययन प्राधिकरणको नियमकानुन मिच्दै हेलिकप्टर सञ्चालन गर्दै आएको कम्पनीले त्यसबाट प्राप्त गरेको करोडौं डलर अपचलन गरेको पाइएको हो । संयुक्त राष्ट्रसंघीय निकायलाई हेलिकप्टर भाडामा लगाउँदै आएको कम्पनीले सोबापत प्राप्त हुने रकम नेपाल भित्र्याउनु पर्ने नियम भएपनि बाहिरबाहिरै वेपत्ता पार्ने गरिएको स्रोतको दावी छ ।

यसरी हुन्छ डलर अपचलन !

स्रोतका अनुसार कम्पनीसँग भएको ६ वटा एमआई १७ का रसियन हेलिकप्टर अधिकांस समय देशबाहिर युएनको काममा डुल्ने गरेका छन् र सो काम पनि प्राधिकरणको नियमविपरित हुने गरेको छ । सन् २०१०, २०१२, २०१३ र २०१४ मा चारओटा हेलिकप्टर युएन अन्तर्गतको विश्व खाद्य कार्यक्रमको काममा प्रयोग गरेको कम्पनीले त्यसबेला प्रतिघण्टा अमेरिकी डलर ८००० मा प्रति महिना ६० घण्टा ज्ञारेन्टी आवर कायम गर्ने गरी काम गरेको थियो । सोहि रकममात्रको हिसाव गर्दापनि एयरलाइन्सले एक करोड डलर (नेपाली एक अर्ब बढी नेपाली रुपैयाँ) आम्दानी गरेको देखिन्छ । तर उक्त रकम नेपाल नै नल्याई अपचलन गरिएको हो ।