काठमाडौं- एनसेलले थ्रिजी सेवाको विस्तारलाई दोब्बर गरी देशको कुल जनसंख्याको ६० प्रतिशतमा पुर्याउने भएको छ । ९०० मेगाहर्ज र १८०० मेगाहर्ज ब्याण्डमा प्रविधि तटस्थता अवलम्बन गर्दै एनसेलले १ करोड ७० लाखभन्दा बढि नेपाली नागरिकमा थ्रिजी सेवा पुर्याउने योजना सार्वजनिक गरेको हो । 

एनसेलको विस्तारित नेटवर्क कभरेजले बझाङ्गको देउरालीकोट, मुगुको श्रीनगर, मुस्ताङ्गको झोङ्ग, ललितपुरको माल्टा र सोलुखुम्बुको तिङ्गला जस्ता हजारभन्दा बढि ग्रामिण तथा दुर्गम ठाउँमा सेवाको पहुँच पुर्याउने जानकारी दिएको छ । 

यी स्थानका बासिन्दाले पहिलो पटक दु्रतगतिको मोबाइल इन्टरनेटमा पहुँच पाउने कम्पनीले जानकारी दिएको छ । यसले देशमा विद्यमान डिजिटल डिभाइडलाई घटाउन योगदान दिई स्थानियवासिन्दाको जीवन, समुदायको अर्थतन्त्र र सामाजिक क्षेत्रमा सकारात्मक प्रभाव पार्ने एनसेलद्वारा जारी प्रेस विज्ञप्तिमा छ। 

प्रविधि तटस्थताले देश र जनतामा ल्याउने वृहत सकारात्मक प्रभावका बारेमा सोचेर उत्साहित छौं, एनसेलका प्रबन्ध निर्देशक साइमन पर्किन्सले भने यसले विषेशतः इन्टरनेट सेवाको पहुँच, नयाँ अवसरको सिर्जना र कुल गार्हस्थ उत्पादनको वृद्धिमा ठूलो भुमिका खेल्नेछ।

प्रविधि हस्तान्तरण तथा पुर्वाधार निर्माणका लागि एनसेलले ३० अर्ब रुपैयाँसम्मको लगानी गर्ने प्रतिबद्ध समेत जनाएको छ । डिजिटल नेपाल निर्माणको राष्ट्रिय लक्ष्य हासिल गर्नका लागि एनसेल पूर्णरुपमा समर्पित हुने जानकारी समेत कम्पनीले जारी गरेको विज्ञप्तिमा छ।