काठमाडौं – प्रदेश नम्वर २ को निर्वाचन परिणाम आफ्नो पक्षमा ल्याउन दलका नेता, कार्यकर्ताहरु रातदिन खट्टिएका बेला भारतीय जासुसी संस्था रअका प्रतिनिधिहरु पनि परिचालन भएका छन् ।
प्रदेश नम्वर २ को निर्वाचनलाई अवलोकन र अध्ययन गर्न भारतीय जासुसी संस्था रअका प्रतिनिधीहरु झण्डै एक महिनादेखि मधेस क्षेत्रमा सक्रिय भएका छन् । वीरगन्जलाई मुकाम बनाएर रअका प्रतिनिधिले आफ्नो गतिविधि सञ्चालन गरिरहेका छन् । रअ प्रतिनिधिले दिएको रिपोट अनुसार भारतीय दैनिक पत्रिका हिन्दुस्तान टाइम्सले वीरगन्ज महानगरपालिका एमाले उम्मेद्धार बसुरिद्धिन अन्सारीलाई अन्डरवल्र्ड डन दाउद इव्रामसँग जोडेर समाचार लेखेको छ ।
एमाले मेयरका उम्मेद्धार अन्सारीले सञ्चालन गरेको वीरगन्ज नेशनल मेडिकल कलेजमा दाउदको लगानी रहेको प्रचार गरिएको छ । रअका प्रतिनिधि दाउदको हवाला दिँदै वीरगन्जमा सक्रिय भएका छन् । रअका नेपाल प्रमुख एबी माथुरको नेतृत्वमा २५ जनाको टोली सक्रियरुपमा लागेको छ । दलका नेतादेखि सरकारका उच्च अधिकारीहरुसँग उनीहरुले नियमित भेटघाट गरिरहेका छन् ।
एमाले उम्मेद्धार अन्सारीलाई रअका प्रतिनिधिले दाउदसँग जोडेपछि एमालेले आपत्ति जनाएको छ । वीरगन्जको समाजसेवामा हुँदा, माओवादी केन्द्रबाट संविधानसभामा उम्मेद्धार हुँदा उनी निस्कलंक तर एमाले उम्मेद्धार हुनसाथ दाउदका ऐजेण्ट भन्न मिल्दैन, एमाले महासचिव इश्वर पोखरेलले भने एमालेलाई हराउन कांग्रेस, माओवादी केन्द्र, राजपा र भारतीय जासुसी संस्थाबीच महागठबन्धन बन्न लागेको छ ।
भारतीय जासुसी संस्थाका प्रतिनिधि र सरकार मिलेर एमाले नेता कार्यकर्ता र उम्मेद्धारमाथी हमला हुन सक्ने आशंका समेत एमालेले गरेको छ । कतिपय हाम्रा उम्मेद्धारलाई धम्किपनि आइसकेको छ, एमाले प्रदेश नम्वर २ का संयोजक सत्यनारायण मण्डलले भने देशभित्र र बाहिर दुवैतिरबाट धम्कि आउने गरेको छ ।
रअ प्रतिनिधिहरु मधेस केन्द्रीत दलहरुबीच चुनावी तालमेल गराउन र एमाले उम्मेद्धारहरुलाई तर्साउन थालेका छन् । मधेस केन्द्रीत दलहरुबीच तालमेल नभए नेपाली कांग्रेस र नेकपा माओवादी केन्द्रबीच तालमेल गराउने प्रयास गरिरहेको एमालेले जनाएको छ ।
नेकपा माओवादी केन्द्रका अध्यक्ष पुष्पकमल दाहाल प्रचण्ड प्रदेश नम्वर २ को चुनावी प्रचारमा पुग्दा भारतीय रअका प्रतिनिधिको गतिविधि बारे जानकारी लिएका थिए । रअ प्रतिनिधिको गतिविधि थाहा पाएपछि दाहालले नेपाली भूमिबाट भारतीय क्याम्प हटाउनु पर्ने प्रतिक्रिया दिएका थिए । – एस काठमाडौँ
