सप्तरी – प्रमुख निर्वाचन आयुक्त अयोधीप्रसाद यादबले आगामी प्रदेश र प्रतिनिधि सभा सदस्यको निर्वाचनमा आचारसंहिता उल्लंघन गर्ने जो कोहीलाई कारवाहीको दायरामा ल्याउने बताएका छन् ।
बुधबार निर्वाचन तयारीको क्रममा गृह जिल्ला सप्तरी पुगेका यादबले सदरमुकाम राजविराजमा आयोजित अन्तरक्रियामा यसपटकको निर्वाचनमा आचारसंहिताको अनुगमन कडाईका साथ गरिने बताए ।
अन्तरक्रियामा उपस्थित राजनैतिक दलका नेताहरुलाई यादबले भने, ‘आफनै जिल्लाको यादब प्रमुख निर्वाचन आयुक्त हो भनेर नभुल्नुस, आचारसंहिता उल्लंघन गरेको खण्डमा कारवाही हुन्छ हुन्छ ।’
उनले सरकारी विद्यालयका शिक्षक र क्याम्पसका प्राध्यापकहरु उम्मेदवारहरुको प्रचारप्रसारमा प्रत्यक्ष सहभागी भएको पाइए आवश्यक कारवाही गर्न प्रशासनलाई समेत निर्देशन दिए ।
आचारसंहिता पालना गर्ने कार्यलाई राजनैतिक दलका नेताहरुले गम्भिरतापूर्वक बुझ्नुपर्ने उनको भनाई थियो । कुनै पनि बहानामा निर्वाचनको स्वच्छतासँग सम्झौता गर्न नसकिने बताउँदै यादबले राष्ट्रिय जिम्मेवारी पूरा गरेरै छोड्ने उल्लेख गरे ।
