">
- अर्थ सरोकार सम्बाददाता
काठमाडौं – नेपाल स्टक एक्सचेन्जले बुधबार एकै पटक १४ वटा कम्पनीको सेयर कारोबार रोक्का गरेको छ । नेप्सेले यी कम्पनीहरुले वार्षिक सूचीकरण शुल्क नबुझाएका कारण सेयर कारोबारमा रोक लगाएको हो ।
कारोबार रोक्का हुने कम्पनीमा हाम्रो विकास बैंक, सिभिल लघुवित्त, काबेली विकास बैंक र कन्काई विकास बैंक रहेका छन् । यसैगरी, कर्णाली विकास बैंक, नागबेली लघुवित्त, महिला सहयात्रा, ललितपुर फाइनान्स र नेसनल माइक्रोफाइनान्सको पनि कारोबार रोकिएको छ । कुबेर मचेन्ट फाइनान्स, समता माइक्रोफाइनान्स, सप्तकोशी डेभलपमेन्ट बैंक, दिव्यश्वरी हाइड्रोपावर र युनिलिभर नेपालको सेयर कारोबारमा पनि रोक लगाइएको छ ।
सूचीकृत कम्पनीहरुले नेप्सेलाई आफ्नो चुक्ता पुँजीको आधारमा सूचीकरण शुल्क बुझाउनुपर्ने हुन्छ । चुक्ता पुँजी १ करोडसम्म हुने कम्पनीले १५ हजार रुपैयाँ र १ करोडदेखि ५ करोड रुपैयाँसम्म भएका कम्पनीले २५ हजार रुपैयाँ सूचीकरण शुल्क तिर्नुपर्ने हुन्छ । यता, ५ करोडदेखि १० करोड रुपैयाँसम्म चुक्ता पुँजी भएका कम्पनीले ३५ हजार रुपैयाँ र १० करोडदेखि माथि चुक्ता पुँजी भएका कम्पनीले ५० हजार रुपैयाँ सूचीकरण शुल्क बुझाउनुपर्छ ।
