- अर्थ सरोकार सम्बाददाता
काठमाडौँ- सोसाइटी फर वेलफेयर अर्गनाइजेसनले बनाएको एउटा बैंकबाट अर्काे बैंकमा रकम पठाउने प्रणाली अन्तर्गत नेपालको एनआइसी एसिया बैंकले प्रयोग गरेको स्विफ्ट ह्याक भएको छ । लक्ष्मी पूजाको दिनदेखि बैंकको स्वीफ्ट ह्याक गरेर विदेशमा पैसा पठाइएको छ । केहि दिन यतादेखि बैंकको स्विफ्ट प्रणालीमा समस्या देखिएको थियो । एनआइसी एसिया बैंकबाट स्वीफ्ट ह्याक गरी पैसा पठाएको भन्ने तथ्य पत्ता लागेपनि कति पैसा विदेश पठाइयो भन्ने खुलेको छैन ।
राष्ट्र बैंकले थाल्यो अनुसन्धान, के जनताको पैसा सुरक्षित छ ?
बैंकको स्वीफ्ट ह्याक गरिएको जानकारी एनआइसी एसिया बैंकले नेपाल राष्ट्र बैंकलाई गराईसकेको छ भने राष्ट्र बैंकको एक विशेष टोलीले उक्त ह्याक प्रकरणबारे अनुसन्धान गरिरहेको छ । नेपाल राष्ट्र बैंकको टोली एनआइसी एसियामा पठाएर आइतवार विहानैदेखि अनुसन्धान सुरु गरिएको बताइएको छ । स्वीफ्ट ह्याक गरी करिव ५ करोड रुपैयाँ हिनामिना भएको आशंका राष्ट्र बैंकले गरेको थियो । करोडौं रुपैयाँ पैसा चोरी भएको आशंका पछी राष्ट्र बैंकले आइतबार विभिन्न देशका केन्द्रिय बैंकलाई ह्याकरले ह्याक गरी चोरी गरेको रकम भुक्तानी रोक्न पत्राचार गरेको थियो । ह्याकरले अमेरिका, सिंगापुर, मलेसिया, जर्मन, हङकङलगायतका देशमा रकम पठाएको राष्ट्र बैंकको टोलीले पत्ता लगाएको छ । ‘करोडौं रुपैयाँ चोरी भएको छ । तर हामीले सम्बन्धित ठाउँमा पत्र पठाईसकेकाले ग्राहकको रकम हिनामिना भने नहुनु पर्ने हो । तर स्वीफ्ट ह्याकचाहिं भएको हो ।’ अनुसन्धानमै खटिएका एक अधिकारीले अर्थ सरोकार डटकमसँग भने ।
बैंक भन्छ, ‘जनताको एक रुपैयाँपनि हिनामिना भएको छैन’
यता बैंकले भने आफ्ना ग्राहकको रकम हिनामिना नभएको स्पष्ट पारेको छ । ‘ बजारमा जसरी एनआइसी एसिया बैंकको रकम चोरियो र करोडौंको नोक्सान भयो भन्ने खबर आएको छ, त्यसमा सत्यता छैन ।’ बैंकका सुचना अधिकारी न्यौपानेले भने, ‘कुनै ग्राहकको खाताको रकम हिनामिना भएको छैन । हाम्रो बैंकले विदेशी बैंकको खातामा राखेको केही पैसामा केही समस्या छ कि भनेर हामीलाई शंका लागेको हो । यस्तो शंका लागेपछि हाम्रो स्वीफ्ट आफैले डाउन गरेर विदेशी विज्ञलाई सहभागी गराएर अनुसन्धान गराइरहेका छौं । आफ्नो नियमित सेवा चलिरहेको बताउंदै बैंकले आफ्ना १३३ वटै शाखा राम्ररी चलेको स्पष्ट पारेको छ । ‘सबै ग्राहक ढुक्क भए हुन्छ । एक रुपैयाँ पनि पैसा हिनामिना भएको छैन ।’ रोशन न्यौपानेले भने ।
यस विषयमा हामीले सोमबारको अपडेट के छ भनेर उनै रोशन न्यौपानेलाई सोध्ने प्रयास गरेका थियौं । तर उनले पटक पटकको प्रयासमा पनि हाम्रो फोन उठाएनन् ।
