एनआरएनको मतदाता सूचीमा नक्कली प्रतिनिधिको नाम भेटियो, निर्वाचन कार्यक्रम तत्काल रोक्न माग

काठमाडौं – गैरआवासीय नेपाली संघको महधिबेशनमा नक्कली प्रतिनिधि भेटिएका छन् । मतदाता सूचमिा नक्कली प्रतिनिधिको नाम भेटिएपछि अहिले एनआरएनमा निर्वाचन स्थगित गर्न माग गर्दै प्रतिनिधिहरुले हंगामा मच्याएका छन् ।

आठौं महाधिवेशनमा मत खसाल्ने मतदाताहरुको दर्तामा घुसपैठ गरी नक्कली प्रतिनिधि दर्ता गरेको भेटिएपछि उनीहरुले हंगामा गरेका हुन् ।

एनआरएन अमेरिकाले स्वीकृत गरी पठाएको अन्तिम सूचीमा नामै नभएका झन्डै ६० जना प्रतिनिधि दर्ता गरेको भेटिएको हो ।

एनआरएन अमेरिकाका अध्यक्ष, आईसीसी केही पदाधिकारी र सचिवालयका एक कर्मचारीको मिलेतोमा अन्य देशका पनि सयौं जना नक्कली प्रतिनिधिको दर्ता गरेको प्रारम्भिक अनुसन्धानबाट पुष्टि भएको छ ।

उच्च स्रोतका अनुसार फर्जी सूची दर्ता गरेको अभियोगमा दर्ता प्रक्रियामा संलग्न एक कर्मचारीलाई समेत निलम्बन गरिएको छ । शनिबार दर्तास्थलबाट एकाएक हराएका ती कर्मचारीले होटलको कोठामा गई ल्यापटपबाट नक्कली प्रतिनिधि दर्ता गरेको भेटिएको हो ।

यहि बिषयलाई लिएर एनआरएन अमेरिकाका सदस्य नारायण थापाले निर्वाचन आयोगलाई निवेदन लेखी प्रतिनिधि दर्ता प्रक्रियामा व्यापक घोटाला भएकाले निर्वाचन प्रक्रिया तत्काल रोक्न माग गरको बुझिएको छ ।