काठमाडौँ – बामगठबन्धनका एमाले- माकेले संसद व्युताउने धम्की दिएपछि देउवा सरकारले त्यसको कडा जवाफ दिएको छ । श्रम मन्त्री एवम् नेपाली कांग्रेसका नेता फरमुल्लाह मन्सुरले संसद व्युताएर देखाउन कम्युनिष्टहरूलार्इ चुनौती दिएका छन् ।
नेपाली रेडियो नेटवर्क सँगको कुराकानीमा मन्त्री मन्सुरले शेरबहादुर देउवा नेतृत्वको अहिलेको सरकार बहुमतमा रहेकोदावी गरेका छन् । ‘कम्युनिष्ट पार्टीहरूले संसद व्युताउँछन् भने व्युताउन् । सरकार अहिले पनि बहुमतमा छ’, उनले भने, ‘कांग्रेसले चिन्ता गर्नुपर्ने अवस्था छैन ।’
सरकार तोकिएको समयमा निर्वाचन गर्ने तयारीका साथ निर्वाचन आयोगलाई सहयोग गरिरहेको मन्त्री मन्सुरले दावी गरेका छन् । उनले भने, ‘संसद व्युतियो भने पनि उनीहरू सत्तामा आउन सक्ने छैनन् । सडकमै रहने छन् ।’ कांग्रेसका नेता समेत रहेका मन्सुरले कम्युनिष्ट पार्टीहरूले हुदै नभएका आरोपहरू लगाएर जनतामा भ्रम छर्ने काम मात्रै गरिरहेको बताए ।
‘चुनावबाट कांग्रेस कुनै पनि हालतमा ब्याक हुँदैन । बरु एमाले–माओवादी डराएका छन् । जनतालाई भ्रम छरेर कम्युनिष्ट अधिनायकवाद ल्याउने तयारी गरेका छन् । यो अधिनायकवादी व्यवस्था ल्याउन उनीहरूको चाहना पूरा हुन दिँदैनौँ ।’उनले भने
सरकारले त निर्वाचन सार्न लागेको छ रे नि केपी ओली र पुष्पकमल दाहाल ‘प्रचण्ड’ले त्यही भनेका छन् कुरा के हो ? भन्ने प्रश्नको जवाफमा मन्त्री मन्सुरले सरकारको बारेमा प्रचण्ड र केपी ओलीलाई कसरी थाहा हुन्छ ? भन्दै प्रतिप्रश्न गरेका थिए ।
‘तोकिएको मितिमा निर्वाचन हुन्छ । निर्वाचन त बरु एमाले र माओवादीले चाहेका छैनन् । उनीहरूको गतिविधिले त्यही देखाएको छ । मुलुकमा राजनीतिक अस्थिरता ल्याउन खोजेका छन् ।’ कम्युनिष्टहरूले झुठ मात्रै बोल्ने गरेको भन्दै मन्सुरले भने, ‘केपी ओली र प्रचण्डको झुठ कुरामा लाग्नु हुँदैन । उनीहरूले अर्नगल कुरा गरेर जनतालाई भ्रममा पारेका छन् ।’
माओवादी केन्द्रका नेता वर्षमान पुनले निर्वाचन नसर्ने बताए । उनले भने, ‘निर्वाचन सर्नु हुँदैन । यदि सरिहाल्यो भने पनि कति समयका लागि हो भन्ने कुरामा भर पर्छ । थोरे समयका लागि हो भने त्यसमा छलफल हुन सक्छ । तर, लामो समय निर्वाचन सार्ने हो भने त्यो सैह्य छैन ।’ उनले त्यस प्रकारका अस्थिरता ल्याउने प्रयास गरिए सरकार नरहिरहने समेत खुलासा गरे ।
