• अर्थ सरोकार सम्बाददाता 

काठमाडौँ- काठमाडौँमा विभिन्न बैंकहरुका एटिएममा विभिन्न खाले समस्या रहेको व्यापक जन गुनासो आउन थालेको छ । यसअघि हामीले सिभिल बैंकको एटीएममा निकै समस्या देखिएको तथ्य प्रमाणसहित पेश गरेका थियौं । आज हामी पुन: काठमाडौँका विभिन्न स्थानमा रहेका एटिएमहरुको क्रस चेक गर्न हिंडेका छौं । कोटेश्वरस्थित हाम्रो कार्यालयबाट हिंड्दा जहाँ जहाँ जुन जुन एटीएम देखिए, हामीले बुझ्ने प्रयास गर्यौं कुन बैंकको एटीएम कस्तो अवस्थामा छ भनेर । 

कार्यालयबाट निस्किंदै गर्दा देखियो सिटिजन्स बैंकको एटीएम । एटीएम मज्जाले चलेको छ । कुनै समस्या पनि छैन । तर दुइ चार जना लाइन बस्नु पर्यो भने अवस्था बिजोग छ । लाइन बस्ने ठाउँपनि छैन । कोहि भित्र पसेको छ भने बाहिर बाटोमै कुर्नु पर्छ । कहिलेकाहीं यहि कुराले यहाँ झगडा पर्नेसमेत गरेको छ । 

नजिकै ग्लोबल आइएमइ बैंकको एटिएम पनि छ । कोटेश्वरमा राम्रो चलेको एटीएममध्ये एक हो उक्त एटीएम मेसिन । कोटेश्वरमा कुनै पनि बैंकका एटीएम चलेनन भने पनि ग्राहक त्यहाँ जान्छन् । तर अन्डर ग्राउण्ड पार्कीङमा जाने ठाउँमा भएकाले हत्तपत्त बाहिरका मान्छेले त्यो एटीएम मेसिन देख्दैनन् । बाटोमा सेन्चुरी र कुमारीका एटीएमहरु भेटिए । कुमारीको एटीएममा त बिरलै मात्र पैसा आउँछ । कोटेश्वरको सबैभन्दा ‘थर्डक्लास’ एटीएम हो यो । सेन्चुरीको एटीएम राम्रै चलेको छ । 

झट्ट हेर्दा थोत्रो जस्तो देखिने कोटेश्वरस्थित प्रभु बैंकको एटीएम भने राम्रै चल्ने गरेको छ । बेलाबेलामा बन्द हुने यो एटीएमको रोग भन्दा पनि बैंकको आन्तरिक समस्या हो । त्यो कुरालाई छोड्ने हो भने चलेका बेला राम्रो चल्ने एटीएम मध्ये प्रभु बैंकको एटीएम पनि एक हो । 

त्यसपछि तिनकुने गएपछि देखिन्छ जनता बैंकको एटीएम मेसिन । तिनकुने र बानेश्वरमा रहेका जनता बैंकका एटीएम राम्रै चल्ने गरेका छन् । तर पैसा नआउने तर खातामा काटिने यो एटीएमको रोग हो । जसबाट अधिकांस ग्राहक पीडीत छन् । कतिले त यो समस्या थाहा पाएका पनि हुँदैनन् । सबैजसो एटीएममा कहिलेकाहीं पर्ने समस्या हो यो । तर जनताको हकमा यो प्राय परिरहने समस्या हो ।

हुन त नयाँ बानेश्वरमा ठुलो एटीएम लंज छ । यसमा धेरै बैंकका एटीएम छन् । प्राय राम्रै चल्छन् । एउटा नचल्दा अर्को एटीएम प्रयोग गर्न पाइने हुँदा पनि ग्राहकहरुलाई सजिलो छ । तर शनिबार प्राय यो लन्जमा पनि समस्या देखिने गरेको छ । नयाँ बानेश्वर छोडेर हामी पुतलीसडक हानियौं । त्यहाँ वरीपरी धेरै बैंक र तीनका एटीएमहरु छन् । 

वाणिज्य बैंकको एटीएममा अधिकांस समय आधा सटर लाग्ने गरेको छ। यसले त्यो एटीएम खुल्ला हो कि बन्द हो भन्ने नै थाहा हुँदैन ग्राहकहरुलाई । 

नेपाल इन्भेष्टमेन्ट बैंक लिमिटेडको एटीएम राम्रो चल्ने एटीएममध्येको एक हो । हामी जाँदा पनि यो एटीएमको अवस्था फर्ष्ट क्लास नै थियो । 

नेपाल विद्युत प्राधिकरणनेर राखिएको यो ज्योति विकास बैंकको एटीएम झट्ट हेर्दा पूरानो पाराको देखिन्छ । एटीएम वरपर कोरीएका सन्देश पनि पूरानै पाराका छन् । तर बटुवाहरु र त्यसमा पनि बसपार्क हिंडेकाहरुलाई सहज बनाएको छ यो एटीएमले । 

नक्कलीहरुको अखडा मानिएको बैंक बैंक अफ काठमाडौँको एटीएमपनि नक्कलीनै जसरी बिग्रेको छ । यो एटीएम प्रयोग गर्ने ग्राहक यति हैरान छन् कि एटीएमबाट पैसा निस्कियो भने पनि युद्ध जितेझैं मान्नुपर्छ । 

नबिल बैंकको एटीएम राम्रा एटीएमहरुमध्येको एक हो । यसको सेवा पनि निकै राम्रो छ । 

ग्लोबल आइएमइ बैंकको एटीएमपनि राम्रो अवस्थामा भेटियो । 

नेपाल बंगलादेश बैंकको एटीएमचाहिं दिवा सेवा जस्तो छ । दिउँसो राम्रो चल्छ । राती परेपछी समस्या देखिन्छ । यो गुनासो यसअघि पनि देखिएको हो । तर गुनासो समाधान भएको छैन ।

सिद्धार्थ बैंकको एटीएम औसत रहेछ। बेला बेलामा बिग्रीरहने यसको रोग हो । तर पनि धेरै ग्राहकले प्रयोग गर्ने एटीएम मध्ये यो पनि हो । 

नेपाल एसबीआइ बैंकको एटीएम राम्रै अवस्थामा भेटिएको छ ।

नाम लक्ष्मी भएपनि यो बैंकको एटीएमबाट लक्ष्मी निस्किने मान्दिनन् । पैसा नआएर कहिले के समस्या कहिले के समस्या हुने एटीएममध्ये यो पनि हो । 

मुक्तिनाथ बिकास बैंकको एटीएमपनि राम्रै अवस्थामा भेटीयो ।

सन्चालक फरार भएको समाचारपछी विवादित बनेको प्राइम बैंकको सेवा पनि धेरै पटक फरार हुने गरेको छ । हामी पुग्दा पनि पैसा नआएर समस्या परेको बताईरहेका थिए त्यहाँका ग्राहक । 

(पहिलो चरणमा हामीले जुन जुन एटीएम देख्यौं, त्यहि त्यहि बारे जानकारी लियौं । अर्को चरणको क्रस चेकमा हामी अन्य एटीएमका अवस्थाबारे प्रस्तुत गर्छौं ।)