प्रहरी सेवामा प्रवेश अवधि ढाँट्दै १६ महिना बढी जागिर खाएर केही दिनअघि पदमुक्त भएका सशस्त्रका डीआईजी नरेन्द्र सिंहले मध्यक्षेत्र वाहिनी पथलैया कार्यालय परिसरमा नै एक महिलालाई राखेको घटना सार्वजनिक भएको छ । काभ्रेको पनौती घर भएकी अनुपमा अधिकारीलाई डीआईजी सिंहले वाहिनीपरिसरमै पे्रमिकासरहको व्यवहार गरेर राखेको घटना सार्वजनिक भएको हो ।
डीआईजी सिंहलाई कहिले काका त कहिले मामा भनेर बोलाउने उक्त युवतीले प्रहरी जवानहरुलाई गालीगलौज गरेर सताउने गरेको अहिले सार्वजनिक भएको हो । उक्त वाहिनीमा कार्यरत तल्लो श्रेणीका प्रहरीहरुलाई काम लगाउने, नमाने गालीगलौज गर्ने गरेको पत्ता लागेको हो । उक्त महिलालाई उनले आफ्नो प्रेमिका बनाएर राखेको त्यहाँ कार्यरत प्रहरी जवानहरुले बताएका छन् । ती महिलाको सबै खर्च डीआईजी सिंहले नै टारिदिएको र उनलाई हिँडडुलका लागि सरकारी गाडीसमेत उपलब्ध गराएको पनि खुलासा भएको छ । डीआईजी सिंहको परिवार र आफन्त आउँदा भने सिंहले ती महिलालाई वाहिनी कार्यालयभन्दा बाहिर लिइएको कोठामा राख्ने गरेको पनि पाइएको छ । उनीहरु दुई जना सँगै हिँड्दा अंकमाल गर्ने चुम्बन गर्नेजस्ता व्यवहार गर्ने गरेको समेत थाहा भएको छ ।
विवादास्पद सशस्त्रका डीआईजी सिंहको पथलैया आएको फागुन दोस्रो साता एक वर्ष पुग्दै थियो । ती महिला सिंह पोखराको वाहिनीपति हुँदा पनि पोखरामै बस्ने गरेको पनि पाइएको छ । सेवा प्रवेशको मिति ढाँटेको पुष्टि भएसँगै उनी एक हप्ताअघि पदमुक्त भएका छन् । प्रहरी किताबखानाले सशस्त्र प्रहरी मुख्यालयमा मध्यक्षेत्र प्रमुख डीआईजी सिंहको सेवा अवधि २१ साउन २०७३ मै सकिएको भन्दै पत्र पठाएको हो ।
सो पत्रसँगै उनले अनिवार्य अवकाश पाएका हुन् । उनले अनिवार्य अवकाश पाउनुभन्दा थप १६ महिना बढी जागिर खाएको देखिएको छ । प्रहरी किताबखानाले डीआईजी सिंहले २१ साउन २०७३ मा अनिवार्य अवकाश पाएको पत्र लेखेको भए पनि सशस्त्र प्रहरी बलको कर्मचारी प्रशासन शाखामा भने उनको सेवा प्रवेशको मिति २१ चैत २०४५ उल्लेख छ । उनी जवानबाट प्रहरी सेवामा प्रवेश गरेका थिए ।
उनी २०४९ मा खुल्ला प्रतिस्पर्धाबाट प्रहरी निरीक्षक बनेका थिए । सिंहले २० साउन २०४१ सालमा नेपाल प्रहरीमा सिपाहीमा जागिर खाएकोमा हवल्दार भएपछि राजीनामा दिएको पाइएको छ । उनले २०४३ सालमा राजीनामा दिएको रेकर्डसमेत भेटिएको छ । सिंहले राजीनामा दिएको तर उपदान नलिएको देखिएको छ । प्रहरी किताबखानाले उनले सिपाहीमा दुई वर्ष १० महिना सात दिन जागिर खाएको र त्यसपछि भगौडा खाली देखिएको पनि जानकारी सशस्त्र मुख्यालयलाई दिएको छ । डीआईजी सिंहले ३० वर्षे सेवा अवधि सुरु नहुँदै भगौडा खाली हुनुभन्दा अघिको समयसमेत जोडेकाले यो स्थिति आएको हो । आर्थिक दैनिकबाट
