काठमाडौं – पूर्वराजा ज्ञानेन्द्र शाहले गएको तिहारमा देशको शासन व्यवस्थामाथि आलोचना गर्दै आफू जिम्मा लिन तयार रहेको विवादास्पद प्रतिक्रिया दिएका थिए । त्यसको एक महिनामै देशभर चुनावको माहोल लाग्यो ।
यही चुनावी माहोलको क्रममा ज्ञानेन्द्र शाह भने परिवारका केही सदस्य सहित धुलिखेलस्थित धुलिखेल रिसोर्टमा बस्दैछन् । श्रीमति कोमल, बुहारी हिमानी र नाती–नातिनालाई लिएर गत बुधबारदेखि त्यहाँ रहेका शाहले केही महत्वपूर्ण व्यक्तिलाई भेट्ने कार्यतालिका रहेको बुझिएको छ ।
शाहले आफ्ना छोरा पारस शाहलाई भने त्यहाँ लगेका छैनन् । चुनावको मुखमै परिवारका केही सदस्यलाई मात्रै लिएर रिसोर्टमा बस्ने उनको योजनाबारे अनेक टिप्पणी पनि भएका छन् । शाह उक्त रिसोर्टमा आइतबारसम्म रहने बताइएको छ । स्रोतका अनुसार यसबीचमा उनी केही महत्वपूर्ण व्यक्तिलाई भेट्नेछन् । साथै विदेशीहरुलाई समेत उनले त्यहाँ भेटघाटको कार्यतालिका बनाएको बुझिन्छ ।
गोप्य योजना बुन्दै
स्रोतका अनुसार शाहले आफ्ना निकट केही बुद्धिजीवीलाई भेट गरी सार्वजनिक रुपमा राजसंस्थाको पक्षमा बोल्न आग्रह गर्ने तयारी गर्दैछन् । उनका निकट एक प्राध्यापकका अनुसार केही प्राध्यापक र बौद्धिकहरु समेत शाहलाई भेट्न त्यहाँ पुगेका छन् ।
भेटपछि चुनावलाई प्रभावित पार्ने गरी राजसंस्थाको पक्षमा अभिव्यक्ति दिने बुझिएको छ । त्यसो त, केही साताअघि मात्रै राजसंस्थाको पक्षमा काठमाडौंमा नारावाजी र र्याली भएको थियो ।
त्यही शिलशिलाको निरन्तरता अनुरुप धुलिखेलमा राजसंस्थाको औचित्य पुष्टि गर्ने बारे गम्भीर छलफल भइरहेको स्रोतको दाबी छ । – नेपाली पत्र
