काठमाडौं – नेपाल टेलिकमले पछिल्लो समयमा अननोन, नो कलर अाइडी, ०१२३४५६, १२३४५६ लगायतका अपरिचित नम्बरबाट कल गरेर ठग्ने र रकम माग गर्ने क्रम बढेपछि त्यस्तो नम्बरबाट फोन नउठाउन आग्रह गरेको छ । टेलिकमका सह प्रवक्ता शोभन अधिकारीले ग्राहकहरुलाई सचेत गराउन त्यस्तो एसएमएस पठाईएको जानकारी दिए ।

विगत केहि दिनअघिदेखि चिठ्ठा परेको प्रलोभन दिने तथा विभिन्न धम्की दिने जस्ता घट्नाहरु बढिरहेको भन्दै टेलिकमले यस्तो गरिएको जानकारी दिएको छ । सह प्रवक्ता अधिकारीले यस्ता फोनहरु ट्रयाक गर्न सकिने र त्यसको लागि केहि समय लाग्ने बताए । उनले यस्ता फोनहरु विभिन्न नेटवर्कबाट आउने गरेको र हाल कुन रुटबाट आइरेका छन् भन्ने अनुसन्धान भइरहेको बताए । 

यसअघि पनि नेपाल दूरसंचार प्राधिकरणले अपरिचित नम्बरबाट फोन आउने गरेको हुँदा सचेतनाको लागि सार्वजनिक सूचना नै जारी गरेर सचेत गराएको थियो ।