">
चितवन – चुनावमा बाहेक अरु समयमा आफ्नो नाकमुख नदेखाउने भन्दै चितवनका मतदाता प्रचण्डदेखि निराश बनेका छन् ।
भोट माग्न घरदैलो अभियानमा जोडतोडले लागेका नेकपा (माओवादी केन्द्र)का अध्यक्ष प्रचण्डले राजनीतिक स्थायित्व र विकासका लागि अहिलेको निर्वाचनमा आफुलाई जिताउन आग्रह गरेपछि मतदाता निराश बनेका हुन् ।
बाम गठबन्धनबाट चितवन निर्वाचन क्षेत्र नं ३ का उम्मेदवारसमेत रहेका दाहालले शुक्रबार त्यहाँका मतदातासँगको भेटघाटका क्रममा संक्षिप्त गरे । अहिलेसम्म जसलाई जिताएपनि स्थानीय जनताहरुका समस्या समाधानका लागि कसैले पनि खासै पहलकदमी नलिएको गुनासो मतदाताहरुको थियो ।
तर प्रचण्डले भने आफ्नो उम्मेदवारी राजनीतिक स्थायित्व र समृद्ध राष्ट्र निर्माणका लागि भएको भन्दै मतदाता रिझाउने कोशिस गरे । उनले ठिक त्यहिबेला बाम गठबन्धनको कुरा निकाल्दै भने- ‘यसैका लागि नै बाम गठबन्धन गरिएको हो ।’
शुक्रबार बिहान भरतपुरको पासरनगरबाट घरदैलो अभियानका क्रममा प्रचण्डले जनताले विकास चाहेकोले आम समुदायको चाहना पूरा गरेरै छाड्ने प्रतिवद्धता समेत व्यक्त गरे । तर कुराभन्दा पनि काम गरेर देखाउने नेतालाई मात्र आफुहरुले पत्याउने मतदाताहरुको भनाई थियो ।
घरदैलोका क्रममा स्थानीय मतदाताहरुले प्रतिबद्धता पूरा गर्न र बाटोघाटोको व्यवस्थापन तथा विकास गर्न आग्रह गरेका थिए । घरदैलोमा आइपुगेका प्रचण्डलाई मतदाता सरस्वती पौडेलले घर अगाडिको भत्किएको बाटो देखाउँदै, छिट्टै बनाउन आग्रह समेत गरिन् ।
आजै शरदपुर हुँदै ३ नम्बर निर्वाचन क्षेत्रका विभिन्न गाउँमा घरदैलो कार्यक्रम गरिने माओवादी केन्द्र चितवनका इञ्चार्ज ईश्वरी भट्टराईले जानकारी दिए । बाम गठबन्धनको अन्य निर्वाचन क्षेत्रका उम्मेदवार समेत अहिले चुनावी घरदैलो अभियानमा सक्रिय भएका छन् ।
यस्तै नेपाली काँग्रेस र राप्रपा प्रजातान्त्रिकलगायत लोकतान्त्रिक गठबन्धनमा आवद्ध उम्मेदवार समेत गाउँगाउँमा चुनावी प्रचार अभियानमा सक्रिय भएका छन्।
