काठमाडौँ  – प्रचण्डपुत्र प्रकाश दाहालको निधनप्रति नेकपा एमालेले दुस्ख व्यक्त गरेको छ ।

एमाले केन्द्रीय निर्वाचन कमिटीका प्रवक्ता विष्णु रिमालले एक विज्ञप्ति जारी गर्दै दाहालको असामयिक निधनबाट आफ्नो पार्टी स्तब्ध भएको जनाएका छन् । साथै एमालेले आज दिउँसो २ बजेदेखि ३ बजेसम्म आयोजित देशैभरका चुनावी कार्यक्रम स्थगित गरेको छ ।

‘कमरेड प्रकाश दाहालप्रति सम्मान व्यक्त गर्न र नेकपा माओवादी केन्द्रका अध्यक्ष कमरेड पुष्पकमल दाहाल प्रचण्ड, शोकाकुल परिवारजन र नेकपा माओवादी केन्द्रप्रति समवेदन प्रकट गर्न नेकपा एमालेको तर्फबाट आज दिउँसो २ देखि ३ बजेसम्म आयोजना गरिएका पूर्वनिर्धारित सबै चुनावी कार्यक्रम स्थगित गरिएको छ’, विज्ञप्तिमा भनिएको छ ।

प्रकाशको हृदयघातका कारण आइतबार बिहान निधन भएको थियो ।