">
पोखरा – नेपाली कांग्रेसका महामन्त्री शशांक कोइरालाले बम गठबन्धन टुक्राउने सम्बन्धि कुरा खुलासा गरेका छन् । उनले एमाले र माओवादी केन्द्रबीच पार्टी एकिकरण हुन नदिन पहल गर्ने बताएका छन् । आइतबार पोखरामा पार्टी कार्यकर्तालाई सम्बोधन गर्दै महामन्त्री कोइरालाले माओवादी अध्यक्ष पुष्पकमल दाहाल ‘प्रचण्ड’लाई वाम गठबन्धनबाट छुटाउन प्रयास थालिने बताए ।
‘पुष्पकमल दाहाललाई गठबन्धनबाट अलग्याउने कुरा उठ्या छन्’, उनले भने, ‘साथीहरुले कुरा गर्नुपर्यो भन्या छन्, म कुरा गर्ने मनस्थितिमा छु ।’ र साथै वामगठबन्धनबाट दाहाललाई अलग्याउन सके कांग्रेसलाई रणनीतिक सफलता मिल्ने कोइरालाको दाबी छ ।
निर्वाचनमा कांग्रेस पराजित हुनुको अपजस पार्टी सभापति शेरबहादुर देउवालाई मात्र नदिन पनि उनले कार्यकर्ताहरुलाई आग्रह गरेका छन् । ‘पार्टी सभापतिलाई आरोप लगाउनुभन्दा कहाँ त्रुटि भएको छ, हेर्नुपर्यो’, कार्यकर्तालाई सम्बोधन गर्दै कोइरालाले भने, ‘त्रुटिहरु धेरै छन् । टिकट वितरणमा त्रुटि भएको छ । मूल्यांकन गर्ने हाम्रो क्षमता कमजोर रहेछ ।’
अबको ५ वर्षसम्म आफू पार्टी सुधारमा केन्द्रित हुने प्रतिवद्धता पनि कोइरालाले व्यक्त गरे । ‘पार्टीलाई चुस्त, दुरुस्त पार्ने मेरो भूमिका हुन्छ, मलाई न प्रधानमन्त्री बन्ने मन छ न पार्टी सभापति’, उनले भने, ‘बिपी कोइरालाले स्थापना गरेको पार्टीमा सुधार ल्याउँछु, त्यो गरें भने मेरो जीवन सफल भयो भन्ने म ठान्छु।’
अबको १० दिनभित्र पार्टीको केन्द्रीय समिति बैठक बसेर निर्वाचनको समीक्षा गर्ने कोइरालाले बताए । संसदमा अब कांग्रेसले सकारात्मक प्रतिपक्षको भूमिका निर्वाह गर्ने कोइरालाको भनाइ छ ।
