डोटी – राजधानीको माग गर्दै आन्दोलनरत डोटीबासीले प्रधानमन्त्री शेरबहादुर देउवाको शव यात्रा गरेका छन् । विहीबार विहान प्रधानमन्त्री देउवालाई चितामा राखेर शवयात्रा गरेर अन्त्यस्टि गरेका छन् ।

आफ्नो सरकारले धनगढी अस्थायी सदरमुकाम तोकेपछि डोटीका नेपाली काँग्रेसका नेता कार्यकर्ताहरुले राजिनामा दिन थालेका छन् । जिल्लाका ३५ नेताहरुले सामुहिक राजिनामा दिएर देउवाको शवयात्रामा सहभागी भएका थिए ।

त्यसैगरी मुकाम धनगढी राख्न देउवालाई साथ दिएको भन्दै आन्दोनलकारीले माओवादी केन्द्रका नेता लेखराज भट्टको पुत्ला जलाइसकेका थिए । आन्दोलनकारीले आफ्नो माग पूरा नभए नागरिकता फिर्ता गर्ने चेतावनी समेत दिँदै आएका छन् ।

काँग्रेसका डोटी उपसभापति लक्ष्मणबहादुर सिंह, सचिवहरु नारायण जोशी र वीरेन्द्र शाह, कोषाध्यक्ष भरत कठायत, सहसचिव तेजबहादुर लुहार, दिपायल नगरपालिकाका पार्टी नगर सभापति गणेश मलासीसहित ३५ नेताहरुले संयुक्त विज्ञप्ति जारी गरी कांग्रेस परित्यागको घोषणा गरिसकेका छन् ।

काँग्रेसका नेता-कार्यकर्ता र समर्थकहरुले पार्टी सदस्यता त्याग गरेको घोषणा गरिरहेका छन् ।