काठमाडौं – प्रा.डा. गोविन्द केसीले भ्रष्ट र माफिया भएको बताउँदै प्रधानन्यायाधीश गोपाल पराजुलीलाई कारवाहीको माग गर्दै अनसन बसेका छन् ।

त्रिवि शिक्षण अस्पतालको डीनमा डा. शशी शर्मालाई पुनर्वहाली गरेको भन्दै डा. केसीले सोमबारबाट फेरि आरमण अनसन सुरु गरेका हुन् । उनको यो अनसन १४ अौं हो ।

अनसन बस्‍नुअघि पत्रकार सम्मेलन गरेर डा. केसीले प्रधानन्यायाधीश पराजुलीमाथि भ्रष्ट र माफिया भएको आरोप लगाउँदै न्यायालय न्याय दिने नभएर किनबेच गर्ने गरेको बताए । उनले भन्,’न्यायालयको मर्यादा बचाउन भ्रष्ट र माफिया प्रधानन्यायाधीश गोपाल पराजुलीविरुद्ध लड्नुको विकल्प छैन ।’

डा.केसीले पाँच बुँदे माग राख्दै अनसन थालेका छन् । पहिलो नम्बरमा पराजुलीको राजीनामालाई राखेका छन्। केसीले पराजुलीमाथि छानविन गरेर कारबाही गर्नु पर्ने बताए ।

त्यसैगरी चिकित्सा शिक्षा आयोग गठन, आईओएमका डीनमा जेपी अग्रवाललाई कायमै राख्नु पर्ने र शशी शर्माका साथै त्रिवि पदाधिकारीलाई बर्खास्त गर्नुपर्ने केसीको माग छ ।