ओखलढुङ्गा – ओखलढुङ्गामा गएराती बिहेको भोजमा युवकहरुबीच झडप भएको छ । झडपका कारण  एकको मृत्यु भएको छ भने पाँच जना घाइते भएका छन् । मृत्यु हुनेमा मोलुङ गाउँपालिका वडा नम्बर ७ का २२ वर्षीय कुमार मगर रहेको प्रहरीले जनाएको छ ।

झडपमा गम्भिर घाइते मगरको सामुदायिक अस्पताल ओखलढुङ्गामा उपचारका क्रममा मृत्यु भएको जिल्ला प्रहरी कार्यालयका प्रहरी निरीक्षक टिका कार्कीले जानकारी दिए । प्रहरी निरीक्षक कार्कीका अनुसार मोलुङ गाउँपालिका वडा नम्बर ७ का गंगाबहादुर मगरको बहिनीको विवाहमा मदिरा सेवन गरेका युवाहरुबीच झडप भएको हो । मदिरा सेवन गरेका शेर्पा समुदायका युवाहरुले मगर परिवारमाथि आक्रमण गरेपछि भागदौड नै मच्चिएको थियो ।