काठमाडौँ – एउटा भनाइ छ– बाहिर बाहिर लोकाचार, भित्रभित्र पोकोपार । नेपाली सामाजले यसलाई अवसरवादीहरुको झाँको झार्न प्रयोग गरेको भए पनि राप्रपा अध्यक्ष कमल थापाले भने यसलाई सिद्धान्तः नै बनाए । र, त उनले बाहिर राजसंस्था र हिन्दू राज्यको रटान लगाए पनि पललोलुपता देखाई गति छाडेर गणतन्त्रवादीहरुसँग एउटै भातभान्सा गर्न पनि कुनै असजिलो मानेनन् ।

गणतन्त्र र संघीयता कार्यान्वयन गराउने कसम खाएर बनेको सरकारमा राजसंस्थाको वकालत गर्ने पार्टी नैतिक रुपमा जान कहींकतैबाट पनि मिल्ने थिएन । तर, थापा यस्ता पात्र बने जसले लोकले कुरीकुरी गर्दासमेत एकपटक होइन, पटकपटक गति छाडेर सिंहदरबारको स्वाद लिइरहे । जनमतको धज्जी उडाउँदै अघि बढेका कमल थापाले त्यसको फल यही जुनीमा भोगेका छन् । प्रतिनिधि सभाको एक स्थानमा त्यो पनि बाम गठबन्धनको सहारामा जित निकाल्न सके पनि थ्रेस होल्ड (न्यूततम मत सीमा) कटाउन असफल रह्यो । मुसा प्रवृत्तिका आधुनिक बिम्ब नै बनेका यिनै थापा एकाएक पूर्वमहाराज ज्ञानेन्द्र शाहको शरणमा पुगे भन्दा धैरैलाई पत्यार नलाग्न सक्छ । तर, पुस १५ गते शनिबार मात्रै राजालाई भेटेर हारगुहार गरेको खबर छ ।

स्रोतका अनुसार राजसंस्थाको नाममा व्यापार मात्रै गरेको निस्कर्षमा पुगेका पूर्वराजा शाहलाई ठूलो संघर्षपछि थापाले नेपालगञ्जमा दर्शन पाएका हुन् । चुनावी परिणाम आफ्नो पक्षमा नआएसँगै रन्थनिएका थापाले ज्ञानेन्द्र शाहको दर्शनका लागि सन्देश पठाएका थिए । तर, ज्ञानेन्द्रले पटकपटक थापाको सन्देश आए पनि सुनेका थिएनन् । तर, चतुर थापाले नेपालगञ्ज उपमहानगरपालिकाका मेयर धवलशमशेर राणाको फेरो समातेर राजालाई दर्शन भेट दिन बाध्य पारेको खबर छ । धवलको आग्रहलाई टार्न नसकेर पूर्वराजाले थापालाई भेट दिएको चर्चा पञ्चहरुबीच भइरहेको छ ।

व्यक्तिवाद र स्वेच्छाचारी चरित्रका कारण पार्टीमा झण्डैझण्डै पारिवारिक सदस्य मात्रै बाँकी राखेका थापाको फुर्ति पूर्वराजालाई भेटेलगत्तै बढेको छ । थापाले पूर्वमहाराजसँगको दर्शन भेटमा पैसा र संगठन नहुँदा हारेको बिन्ती बिसाए पनि त्यसमा उनले कुनै प्रतिक्रिया नजनाएको स्रोतको दाबी छ । तर, थापाले भने ज्ञानेन्द्र शाहलाई भेटेलगत्तै पूर्वराजासँग आफ्नो अहिले पनि सुमधुर सम्बन्ध रहेको गफ दिन थालेका छन् । – साँघु साप्ताहिबाबाट