काठमाडौं – नेकपा माओवादी केन्द्रका अध्यक्ष पुष्पकमल दाहाल (प्रचण्ड)लाई काँग्रेसले प्रधानमन्त्रीका लागि अफर गरेको उनले बताए । तर, उनले चुनावी गठबन्धन भन्दा बाहिर गएर आफु प्रधानमन्त्री नहुने बताएका छन् ।
काँगेसले प्रधानमन्त्रीका लागि अफर गरेको छ किन भन्ने प्रश्नमा आज पार्टी मुख्यालयमा पत्रकारसँग कुरा गर्दै प्रचण्डले भने, ‘मैले त्यस्तो सोचेको छैन । बामगठबनधन बनाएर निर्वाचन लड्यौँ । पार्टी एकताको संकल्प गरेर निर्वाचन लड्यौ । जनताले अनुमोदन गरेकाले त्यो भन्दा बाहिर गएर मैले प्रधानमन्त्री हुने सोचेको छैन ।’
अव सरकार निर्माणको बाटो पनि खुला भएको र अध्यादेश पनि अगाडि बढेको छ । त्यसैले अब कुनै समस्या नभएकोले कानुनी प्रक्रिया पुरा गरि छिटो भन्दा छिटो सरकार गठन गर्ने बारे उनले बताउनु भयो । त्यसका साथै प्रचण्डले एकदुई दिनमा पार्टी एकता संयोजन समितिको वैठक बसेर एकताको प्रक्रिया अगाडि बढाउने बताए ।
यसैबीच पूर्व तयारी अनुसार बुधबार एमाले अध्यक्ष केपी अोली र माओवादी केन्द्रका अध्यक्ष पुष्पकमल दाहाल प्रचण्डबीच हुने भनिएको भेटवार्ता स्थगित भयो । एमाले अध्यक्ष ओलीका प्रेस संयोजक चेतन अधिकारीका अनुसार अध्यक्ष ओलीको स्वास्थ्यमा आएको समस्याका कारणले गर्दा बुधबार हुने भनिएको भेटवार्ता स्थगित भएको हो ।
दुई नेतावीचको भेटवार्तापछिमात्रै पार्टी एकता संयोजन समितिको बैठक बोलाउन यसअघि दुवै नेता सहमत भएका थिए । पार्टी एकता गर्न पार्टी एकता संयोजन समितिको बैठक छिटो डाक्नुपर्ने दवाव नेताहरुलाई छ ।
एकताबारे फरक फरक धारणा आउन थालेपछि माओवादी बैठकमा अध्यक्ष प्रचण्डले एकताबारे शंका नगर्न आग्रह गर्दै आफु र ओलीबीच भेटबार्ता भएलगत्तै एकता संयोजन समितिको बैठक राख्ने बताएका थिए ।
तर, विगत केही दिनयता एमाले अध्यक्ष केपी ओली अस्वस्थ भएपछि उनीहरुबीचको भेटबार्ताको समय लम्विएको हो । दुई नेताहरुबीच सैद्धान्तिक रुपमा पार्टी एकता गर्ने भने पनि सगठनात्मक रुपमा सहमतिको खाका नबन्दा एकता घोषणामा ढिलाई हुदै आएको छ ।
एमाले अध्यक्ष ओली र प्रचण्डबीच पछिल्लो पटक गत शुक्रबार भेटघाट भएको थियो ।
