काठमाडौँ – नेकपा एमालेका सचिव योगेश भट्टराईले माओवादी केन्द्र विलय हुन तयार भएमात्रै एकता सम्भव हुने बताएका छन् । पार्टीका प्रचार विभाग प्रमुख समेत रहेका भट्टराईले त्यसैगरी एमालेमा विलय हुन तयार हुनुपर्ने बताउँदै एकले अर्काको अस्तित्व स्वीकार गर्नुपर्ने बताए । उनले दुबै पार्टी विलय हुन तयार भएमात्रै पार्टी एकता हुने बताए ।
प्रेस चौतारी सुनसरीले मंगलबार धरानमा गरेको पत्रकार भेटघाटमा भट्टराईले पार्टीको नीति, सिद्धान्त र संगठनको रुपरेखालाई एकरुपता दिएपछि निर्णायक एकता हुने बताए । उनले पार्टी नेतृत्वको विषयमा भ्रम छरेर एकतालाई टुटाउन खोजेको आरोप समेत लगाए ।
नेतृत्वको विषय उचालेर पार्टी एकतालाई भाड्न खोजेको बताउँदै सचिव भट्टराईले एकता हुनासाथ नेतृत्वको सवालको पनि हल हुने बताए । उनले सरकार निर्माण र पार्टी एकता सँगसँगै अगाडि बढ्ने जानकारी दिएका थिए ।
सचिव भट्टराईले यसो भनिरहँदा महासचिव इश्वर पोखरेलले भने पार्टी एकता र सरकार एउटै विषय नभएको बताइरहेका थिए । पोखरेलले सरकार निर्माणपछि मात्रै पार्टी एकताको प्रक्रिया अगाडि बढ्ने बताउँदै आएका छन् ।
