• अर्थ सरोकार सम्बाददाता 

नुवाकोट- नुवाकोटमा नक्कली नोटको बिगबिगी बढेको छ । यतिसम्मकि जिल्ला प्रशासन कार्यालयमै नक्कली नोट फेला परेको छ । जिल्ला प्रशासन कार्यालयमा राहदानीमार्फत संकलन भएको राजश्व रकम नेपाल बैंक लिमिटेडमा दाखिला गर्ने क्रममा पाँच सयको एक थान नोट नक्कली पाइएको हो । नोट राहदानी बनाउन आउनेले ल्याएको शंकामा अनुसन्धान थालिएको छ तर कसले त्यसरी नक्कली नोट ल्यायो भन्ने अझै एकिन भएको छैन । 

यसो त यसरी अनुसन्धान गरेर नक्कली नोट कसले ल्यायो भन्ने भन्न सकिने अवस्था पनि रहँदैन । उक्त ५ सयको नोट राजश्व दाखिला गरिएको रकम बैंकले गणना तथा जाँच गर्ने उपकरणमार्फत परीक्षण गर्दा नक्कली  भएको पुष्टि भएको प्रशासन कार्यालयका लेखापाल रामजी लम्सालले जानकारी दिए । 

नक्कली नोटको नंं ग (४६) ०३६८६० रहेको छ । झट्ट हेर्दा सक्कली जस्तै देखिने नक्कली नोट प्रशासन कार्यालय र बैंकका कर्मचारीले गणना गर्ने क्रममा समेत थाहा नभएको र उपकरणमार्फत गणना तथा जाँच गर्ने क्रममा पत्ता लागेको हो ।