">
- अर्थ सरोकार सम्बाददाता
ललितपुर – ललितपुरमा नाम चलेका स्कुल तथा कलेजहरुले राज्यलाई कर नतिरेको खुलासा भएको छ । लामो समयसम्म पनि कर तिर्न बाँकी रहेपनि कर नतिरेर ललितपुरका विभिन्न स्कुलहरुले राज्यको नियमको धज्जी उडाएको पाइएको हो । ललितपुर महानगरको रेकर्डमा नेपालमै बढी चलेका मध्येका कलेज तथा स्कुलले पनि राज्यलाई कर नतिरेको पाइएको हो । ललितपुर महानगरका राजस्व प्रशासन महाशाखा प्रमुख डिल्लीराम शाक्यका अनुसार करको दायरामा ल्याउन धेरै प्रयास भएपनि धेरै संस्थाहरुले अझै पनि कर तिरेका छैनन् ।
कुन-कुन स्कुलले तिरेका छैनन् कर ?
महानगरको रेकर्डअनुसार हात्तिवनस्थित लिटिल एन्जल्स स्कुलले पाँच करोड रुपैयाँ राजस्व तिर्न बाँकी छ । डीएभी स्कुलले दुई करोड, धापाखेलस्थित जेम्स स्कुलले एक करोड ५० लाख, रातो बंगला स्कुलले ५० लाख, आदर्श विद्या मन्दिरले एक करोड, ब्रिटिस स्कुलले ५० लाख, युनाइटेड एकेडेमीले १० लाख र प्रसादी एकेडेमीले १० लाख रुपैयाँ घर जग्गाबापतको कर तिर्न बाँकी छ ।
यता अधिकांस विद्यालयले घर बहाल कर समेत नतिर्ने गरेको पाइएको छ । नियम अनुसार १०% घर बहाल कर राज्यलाई तिर्नुपर्छ । ‘हुन त घर बहाल कर घरभेटीबाट आउनुपर्ने हो । कतिपय स्कुलका संचालकका आफ्नै भवन पनि छन् । ती पनि घरबहाल करको दायरामा आउँछन् । तर अधिकांसले घरबहाल कर तिरेका छैनन् ।’ ललितपुर महानगरका राजस्व प्रशासन महाशाखा प्रमुख डिल्लीराम शाक्यले भने ।
राजनीतिक आडमा मनपरी, भारतीय लगानीको कलेजको यस्तो दादागिरी
यसो त यी कलेजहरु ठुलै राजनीतिक संरक्षणमा समेत छन् । कसैले पनि छुन सक्दैन भन्ने शैलीमा यी कलेज तथा स्कुलहरुले मनपरी गरिरहेका छन् । कर नतिर्नेहरुमध्ये लिटिल एन्जल्स स्कुलका मालिक ठुलो अहोदाका व्यक्ति हुन् । यस्तै डीएभी सिधै भारतीय दुतावासको संरक्षणमा छ । यस्तै रातो बंगला। आदर्श विद्या मन्दिर, ब्रिटिस स्कुल, युनाइटेड एकेडेमी र प्रसादी एकेडेमी पनि ठुलै राजनीतिक संरक्षणमा भएका कारणले यी कलेजहरुले जस्तो मनपरी गर्दा पनि उनीहरुलाई कारवाही हुन सकेको छैन ।
