रौतहट – जिल्ला इन्चार्ज बारुद सिंह भन्ने सुरेन्द्र यादव पक्राउ परेका छन् । भूमिगत जनतान्त्रिक तराई मुक्ति मोर्चाको सैन्य कमान्डर रहेका उनलाई प्रहरीले आइतबार पक्राउ गरेको हो ।

ज्वाला सिंह नेतृत्वको जनतान्त्रिकमा लामो समयदेखि भूमिगत जीवन बिताएका यादवमाथि सर्लाही जिल्ला प्रहरीमा अपहरण तथा फिरौती मुद्दा दायर रहेको र गत जेठ १५ गते सर्लाहीको बरहथवा ४ का राम पुकार राय यादवको ८ वर्षका छोरा गोलु राय यादवलाई अपहरण गरी २० लाख फिरौती लिएको आरोप यादवमाथि रहेको बताइएको छ ।

जिल्ला प्रहरी कार्यालय सर्लाहीमा कर्तव्य ज्यानका दुई, अपहरण तथा शरीर बन्धक, चन्दा असुली र विस्फोट गरी ६ वटा मुद्दा रहेको सर्लाही प्रहरीले बताएको छ । भारतको सीतामढी जिल्लाबाट सिआइबीको टोलीले यादवलाई पक्राउ गरी जिल्ला प्रहरी कार्यालयलाई बुझाए बताइएको छ ।

रौतहटको गरुडा नगरपालिका ६ अमरपटीका ४२ वर्षीय यादवमाथि जिल्ला प्रहरी कार्यालय रौतहटमा पनि गम्भीर अपराधका मुद्दाहरु विचाराधीन छन् । प्रहरीको मोस्ट वान्टेड सूचीमा रहेका उनीमाथि बम विस्फोट, आगजनी लगायतका गम्भीर प्रकृतिका ४ वटा मुद्दा छन् ।