धनगढी – कैलालीको घोडाघाडी नगरपालिकाकी रोमा चौधरीलाई बोक्सी भन्दै ६ घण्टासम्म यतना दिनेहरुलाई प्रहरीले सार्वजनिक गरेको छ । विहीबार प्रहरीले पत्रकार सम्मेलन गरेर उनीहरुलाई सार्वजनिक गरेको हो ।
अाफूलाई भोलेबाबा भन्दै अाएका रामबहादुर चौधरी, किस्मती चौधरी ढुसरकी स्मारिका चौधरीलाई प्रहरीले सार्वजनिक गरेको छ । रोमालाई कुटपिट गर्न तीनै जनाका मुख्य भूमिका रहेको भन्दै प्रहरीले पक्राउ गरेको हो ।
कैलाली प्रहरीका अनुसार पक्राउ परेकाहरुलाई अदालतबाट म्याद थप गराई अनुसन्धान भइरहेको छ । उक्त घटनामा मतियारको रुपमा रहेका रामबहादुर चौधरीकी ४१ वर्षीय आमा सितारानी चौधरी, बेद प्रसाद चौधरी र सोही ठाउँकी चनकलाल चौधरीलाई समेत नियन्त्रणमा लिएर प्रहरीले अनुसन्धान गरिरहेको छ ।
बोक्सी भन्दै रामबहादु चौधरी र उनका सहयोगीले ६ घण्टासम्म लगातर रोमालाई यातना दिएका थिए । गाउँभरीका सर्वसाधारणलाई भेला गरेर सार्वजनिक रुपमै रोमालाई कुटपिट गरिएको थियो । उक्त कुरा सार्वजनिक भएपछि सुरुमा प्रहरीले रामबहादुरलाई पक्राउ गरेको थियो । तर घोडाघोडी नगरपालिकाका मेयरले छुटाएका थिए ।
घटना संचारमाध्यम भइरल भएपछि सरोकारवाला नियकाहरुको ध्यानाकर्षण भएको थियो । प्रहरीले रामबहादुरसहित उनका सहयोगीलाई पक्राउ गरेर अनुसन्धान गरिरहेको थियो ।
देशभर अन्तर्राष्ट्रिय श्रमिक महिला दिवस मनाइरहेको बेला फागुन २४ गते उक्त घटना घटेको थियो ।
घटनामा पीडकलाई बचाउन खोजेको भन्दै घोडाघोडी नगरपालिकाका मेयर ममताप्रसाद चौधरी निकै विवादित भएका थिए । उनमाथि अज्ञात समूहले गोली र खुकुरी प्रहार गरेको थियो । उनका हाल काठमाडौंस्थित शिक्षण अस्पतालमा उपचार भइरहेको छ ।
