काठमाडौँ- राष्ट्रिय वाणिज्य बैंकको साखा उद्घाटनका क्रममा काभ्रेपलान्चोकमा बालबालिकाको दुरुपयोग गरिएको पाइएको छ । शनिबारको दिन सरकारी ड्रेस लगाएर उनीहरुलाई जवर्जस्ती वाणिज्य बैंकको लोगो इंकित भएको प्लेकार्ड बोकी नगर परिक्रमा गर्न लगाएर बैंक र स्कुल दुबैले बालअधिकार सम्बन्धि कानुनको धज्जी उडाएका छन् । काभ्रेको भकुण्डेबेसीमा साखा उद्घाटनका क्रममा यस्तो दृश्य देखिएपछि काभ्रेका अधिकांस पत्रकार, बुद्धिजीवी तथा अधिकारकर्मीहरुले यसको विरोध गरेका छन् ।   

यद्यपी यता बैंकले भने वित्तीय साक्षरताको लागि विद्यार्थीहरुलाई प्रयोग गरिएको बताएको छ । ‘वित्तीय साक्षरता अभियानका लागि विद्यार्थी उतारेका हौँ । अहिले यो कामको खुब बिरोध त भएको छ । तर हाम्रो नियत गलत थिएन ।’ वाणिज्य बैंकका एक कर्मचारीले अर्थ सरोकार डटकम सँग भने, ‘प्लेकार्डमा व्यापारिक प्रयोजनजस्तो देखिने वा सोलिसिट गर्ने जस्तो देखिने गरी प्ले कार्ड बनाउनु हाम्रो गल्ती भयो । तर हाम्रो नियत गलत थिएन भन्ने कुराचाहिं सबैले बुझिदिए हुन्थ्यो ।’ शनिबारको दिन यसरी विद्यार्थी उतार्न पाइन्छ, त्यो पनि बैंकको बिज्ञापनका लागि भन्ने हाम्रो प्रश्नमा ती कर्मचारीले भने. ‘मलाइ त बैंकले गलत गरेको महसुस नै भएको छ । तर मलाइ भएर हुन्न । हाकिमहरुलाई हुनुपर्यो ।’

यता यस विषयमा हामीले भकुण्डेबेसीका सम्बन्धित अधिकारीलाई बुझ्न खोज्दा भने उनी सम्पर्कमा नै आएनन् । यद्यपी भकुण्डेमा भएको यो कामको चौतर्फी विरोध भएको छ । यता विद्यार्थीहरुले समेत आफुलाई स्कुलले बोलाएकाले आएको दावी गरेका छन् । ‘सरले भनेर आएको । बैंकमा पैसा राख्न पाइन्छ रे पछि’ एक विद्यार्थीले अर्थ सरोकार डटकमसँग अबोध पाराले भने, ‘यो बैंक हाम्रो सरको बैंक रे !’