काठमाडौं – सभापति शेरबहादुर देउवाको कडा आलोचना र वर्तमान सरकारलाई सर्वसत्ताबादको आरोप लगाउँदै नेपाली कांग्रेस जिल्ला सभपातिहरुको भेला सकिएको छ । भेलामा अधिकाँस जिल्ला सभापतिहरुले कांग्रेस सभापति देउवा वर्तमान सरकारबिरुद्ध उभिन नसक्ने आरोप समेत लगाएका थिए । उनी निकटकै जिल्ला सभापतिहरुले वर्तमान सर्वसत्ताबादी सरकारका बिरुद्ध कदम चाल्न नसक्ने भए नेतृत्व खाली गरिदिन देउवालाई आग्रह समेत गरेका थिए ।
कांग्रेस जिल्ला सभापतिहरुको भेलाले १९ बुँदे हेटौंडा घोषणापत्र पनि जारी गरेको छ । तीन दिनसम्म चलेको भेलाले सरकारमा जनविरोधी चरित्र देखिएको भन्दै त्यसको बडारुपमा प्रतिवाद गर्ने निर्णय समेत गरेको छ । ‘कम्युनिस्ट सरकारले सञ्चार माध्यममा निषेध र नियन्त्रणकारी हस्तक्षेप, न्यायपालिकालाई प्रभावित पार्ने अभिव्यक्ति, कर्मचारी र शैक्षिक क्षेत्रमाथि अन्यायपूर्ण आतंक, एनजीओमाथि नियन्त्रणकारी रबैया अपनाएको छ’ घोषणापत्रमा भनिएको छ, वर्तमान सरकार सर्वसत्तावाद उन्मुख रहेको प्रष्ट छ ।’
