काठमाडौं – नेपाल र चीनबीच आठ उत्तरी नाका खोल्ने सम्झौता हुने भएको छ । परराष्ट्रमन्त्रालयका अनुसार प्रधानमन्त्री ओलीले चीन भ्रमणमै रहेका बेला आठ उत्तरी नाका खोल्ने सम्झौता गर्ने भएका छन् । आठ नाका खोल्ने सम्झौता भएपछि नेपालले मालसामान ढुवानी गर्न तिब्बती राजमार्गको प्रयोग गर्न पाउनेछ । त्यसबाट कालान्तरमा नेपालले दुई देशबाट मात्र नभइ तेस्रो मुलुकबाट समेत सामान ढुवानी गर्नका लागि बाटो खुल्न परराष्ट्रमन्त्रालयले जनाएको छ ।

प्रधानमन्त्री ओलीको चीन भ्रमणबाट रसुवागढी, दार्चुला, ताप्लेजुङ र हुम्लाको चाक्चेनाम्ला नाका खोलिने भएका छन् । परराष्ट्र मन्त्रालयका सूचना अधिकारी रामबाबु ढकालका अनुसार अहिले नै नाका खोल्ने विषयमा सम्झौता हुनेछ । मन्त्रालयका सह–सचिव नवराज ढकालले भने, ‘नेपाल र चीनबीच ट्रान्जिट सम्झौता भइसकेकोले नेपालले अन्य मुलुकबाट चिनियाँ ट्रान्जिट प्रयोग गर्दै सामान ल्याउने कुरा यसभित्र पर्छ।’