काठमाडौं – नेपाल टेलिकमको जीएसएम तथा सीडीएमए पोष्टपेड मोबाइलमा अब अन्तर्राष्ट्रिय कलका लागि आईएसडी सुविधा सेवाग्राही आफैले लिन सक्ने भएका छन् । यो सेवा आज (असार ०१ गते) देखि नै सञ्चालनमा आएकोे नेपाल टेलिकमले जनाएको छ ।

टेलिकमका अनुसार आईएसडी सुविधा शुरुमा लिन जीएसएम मोबाइलका लागि ‘००००’र सीडीएमए मोबाइलका लागि ‘१२३४’ डिफल्ट पिन नम्बर हुने छ ।

जीएसएम मोबाइलमा आफ्नो पिन नम्बर प्रयोग गरी आईएसडी सेवा खोल्नका लागि सेवाग्राहीले ३३३१८ पिन ३ डायल गर्नु पर्नेछ भने सेवा बन्द गर्नको लागि ८३३१८ पिन ३ डायल गर्नु पर्ने टेलिकमले जनाएको छ । साथै आफ्नो आईएसडी सेवा खुला वा बन्द रहेको जानकारी लिनका लागि ८३३३१३ डायल गर्नु पर्नेछ ।